Champions League goal 50 thun tling Mbappe
Real Madrid a zawm hnuah PSG leh France team-a a ropui ang kha pha rih lo mah se Kylian Mbappe chuan Thawhlehni zan Champions League khelh chhunzawm leh tak league stage-ah goal khungin Atalanta lakah a team chu 3-2 hnehna a chanpui a, chutih rualin a career-ah Champions League goal 50 a thun tling ta chiah bawk.
Heti zat goal hi match 79 atanga a khawl tlin niin, kum 24 leh ni 284-a upa a nih lai kum 2012 daih tawha Lionel Messi Champions League goal 50 thun tlin hnuah kum 25 leh ni 356 mi ni chungin Mbappe hian Champions League-a goal 50 khung tling thei naupang ber dawttu nihna a rawn hauh zui ta bawk a ni.
First half-ah vek hian goal khat dang khung belhna hun remchang hmu mah se box pawn atanga a ball thawnluh chu an lo dansak a; half time hma minute kua chauh awm tawhah hliam avangin lakchhuah a ni a, a hmunah Rodrygo dahluh niin, he thu buatsaih lai thleng hian a hliam dinhmun diktak tarlan hman a ni lo a; Real Madrid boss Carlo Ancelotti chuan Mbappe kaihza tha nuam lo chu serious tak nia a lan loh thu sawi chungin Nilaini lama endik a nih tur thu a sawi.
Italian coach chuan, “Tlanchhuah dawk zawk ang kha a harsat deuh a, khak deuhtu a awm avangin thlak mai kha tha ber turah kan ngai a ni,” tiin a forward dinhmun hmasa a sawi.
Kylian Mbappe hliam hi a ziaawm tura ngaih a nih avangin Real Madrid hliam list-a ziahluh mek Dani Carvajal, Eder Militao leh Eduardo Camavinga-te hnung zui ve lo tura ngaih a ni!
France captain hi Spain leilungah a la insiamrem hlei thei lo kan tih rualin season kal laiah Bernabeu club tan inelna hrang hrang game 22 a khelh tawh atangin goal 12 chu a ngah tling leh tawh a, a chimchin a lo san thin em avang khan a laka tehna buklung pawh a sang ve lo thei lo bawk a ni!
Gewiss Stadium chhung mipui 22,967 hmaa France international Mbappe goal hmahruai hi minute 10-na leka Brahim Diaz siamsak atanga a tihluh niin, he goal khat hi mikhual team-in chawlhlawk thleng hmahruaina’n an hmang hman teuh hle a, mahse, first half hun pekbelh minute hnihna a kal mek laiin Atalanta lamin Sead Kolasinac hlawhchhuah penalty atangin an siphurh sutna hun remchang an hmu nawlh a, Charles De Ketelaere chuan goal-ah chantirin team pahnih hi 1-1-in an inthen phawt.
Second half tir lamah inhnaih takin Vinicius Jr leh Jude Bellingham-te’n Madrid club tan an khung a; a hnu rei vak lo minute 65-ah Ademola Lookman chuan Serie A club beiseina thar siamsak turin an siphurh sut then bawk mah se chak mamawh Real hian hun tawp lama Atalanta tlawm hreh nawr na zet an dang tluan thei hram a, an mamawh tak point thum an hlawhchhuak.
Spanish giants hi kumin Europe-ah an talbuai tlat a, Italy rama Thawhlehni zan match an khelh hma game nga an khelh tawhah vawithum ngawt an tlawm a, Atalanta laka hnehna an changkir leh ta khan inrintawkna siamsakin, knockout stage tur tura an beiseina pawh a nung thar leh tura ngaih a ni.
Kha hnehna avang khan team 36 inel mekna league table-ah Real hian 18-na luah chhoin, automatic-a knockout stage luh phakna chin top eight thleng turin point thum chiahin a dang tawh!
Hetih lai hian Atalanta ve thung erawh point 11 nei chungin pakuana an ni mek thung.
-- Advertisement --
Thawhlehni UEFA Champions League
League Stage result
Dinamo Zagreb 0-0 Celtic
Girona 0-1 Liverpool
Atalanta 2-3 Real Madrid
Bayer Leverkusen 1-0 Inter Milan
Brest 1-0 PSV
Club Brugge 2-1 Sporting CP
RB Leipzig 2-3 Aston Villa 3
Red Bull Salzburg 0-3 PSG
Shakhtar Donetsk 1-5 Bayern Munich