Champions League group ngaihven hlawh Group F

Champions League group ngaihven hlawh Group F
Ningania 2023-24 Champions League group stage draw-ah Paris St-Germain, Borussia Dortmund, AC Milan leh New-castle United chu group khatah an awmho a, he group hi ngaihven hlawh tur a ni ang.
Magpies hi kum 2002-03 hnu lama group stage an khelh leh vawikhatna tur niin, an tum tur team thumte hi tunhnai kum 16 chhunga vawikhat tal final lo khel tawh vek an ni a, kum 20 zet an kalbo hnua Europe club inelna lian bera an kirlehna group hi a hraw mah mah ang em?!
Season liamta league-a palina ni chungin Newcastle hian Europe an chuangkai a, Eddie Howe team tan an group hi chona lian a ni ngei ang.
A chhan pawh PSG hi kum 2020 finalist niin, tum sarih ngawt European champion ni tawh Milan hi season liamta semi-finalist kha an ni bawk.
Group F-a St. James’ Park club tum tur dang Borussia Dortmund pawh hi kum 1997-a he competition-a lo champion ve tawh an ni a, final an luh hnuhnunber chu kum 10 kalta kha a ni.
Group G lamah champion lai Man-chester City chu RB Leipzig, Red Star Belgrade leh Swiss club Young Boys-te nen an inkhel dawn a, harsatna lian tawk loa last 16 lut chho phawt tura ngaih ngheh an ni.
City hian a vawikhatna atan kuminah European title an la a, season thar group stage-a an tum tur pakhat Leipzig hi nikuma 7-0 tehrenga an sawp hnu kha a nih avangin Pep Guardiola team tan round of 16 kalkawngah hlauhthawn viau tur awmin a lang lo!
Red Star Belgrade hian kum 1991 daih tawh khan European Cup an lo hawn ve tawh a, mahse, Etihad club tana harsatna thlen thei tur khawpa khawng an nih a rinawm loh.
Record siam vawi 14 champion tling thei awmchhun Real Madrid chuan Group C lamah Serie A champion Napoli, Braga leh Union Berlin an tum ang.
Group A lamah German heavy-weights Bayern Munich, Manchester United, FC Copenhagen leh Galatasaray an awmho ve bawk.
United leh Bayern hi Champions League-a tum 11 zet intawng tawh niin, chu’ng zinga hmingthang zui ta ber chu 1999 final kha niin, English club vung vanglai a ni a, Munich club-in treble champion an nihna tur an dal zo lo.
Kumin nipui transfer hun lai khan team pahnih hi Tottenham atanga England striker Harry Kane lakchhuah tuma tankhawh zingah telin, player-in Bundesliga champion lama kal a thlang ta zawk a nih kha.
Season liamta runners-up Inter Milan chu Benfica, RB Salzburg leh Real Sociedad-te nen Group D lamah an awmho a; chutih laiin European specialist leh Europa League winner ni bawk Sevilla leh Arsenal chu Group B-ah PSV Eindhoven leh RC Lens-te nen an insu dawn a; Gunners hi kum 2016-17 hnu lama Champions League-a an inlan leh vawikhatna tur a ni.
La Liga champion Barcelona pawh group khawng lem lo tak tura ngaih Group H-ah Porto, Shakhtar Donetsk leh Royal Antwerp-te nen last 16 luh an inchuh dawn.
Group E luahtute ve thung chu – Dutch champion Feyenoord, Atletico Madrid, Lazio leh Celtic niin, Feyenoord leh Celtic hi kum 1970 final-ah intum tawhin, extra time khelh hnuah Dutch team hian 2-1 hnehna an chang.
Champions League group stage hi September ni 19 atanga khel tanin December ni 13 thleng awh tur a ni a; nakum February thlaah knockout stages an tan ang a, June thla final khelhna hmun atan London khaw Wembley Stadium tihfel a ni tawh.

Group stage draw

Group A: Bayern Munich, Manchester United, FC Copenhagen, Galatasaray

Group B: Sevilla, Arsenal, PSV Eindhoven, RC Lens

Group C: Napoli, Real Madrid, Braga, Union Berlin

Group D: Benfica, Inter Milan, Salzburg, Real Sociedad

Group E: Feyenoord, Atletico Madrid, Lazio, Celtic

Group F: Paris St-Germain, Borussia Dortmund, AC Milan, Newcastle United

Group G: Manchester City, RB Leipzig, Red Star Belgrade, Young Boys

Group H: Barcelona, Porto, Shakhtar Donetsk, Royal Antwerp