Champions League hmahruaitu Aston Villa

Thawhleh zan khan UEFA Champions League 2024-25 khelh chhunzawm a ni a, an mualah si hnih faia chak Aston Villa chu table-a hmahruaitu thar an ni. Thawhleh zana inkhel dangah EPL club lian Arsenal pawhin hnehna an chang. Villa leh Arsenal an chak laiin Paris St-Germain an chak zo lo thung. Thawhleh zana UCL result kan hrut kual thuak thuak ang.
A chung berah Villa
Kum tam tak hnuah Europe a football club te inelna ngaihhlut hlawh ber UEFA Champions League hmachhawn ve leh ta nawlh Aston Villa chuan duhthusama thain bul an tan a, vawi thum an chak zawn der tawh. Villa Park-a an mikhual Bologna hnehtu Aston Villa hi table-ah hmahruaitu thar an ni. UCL table-ah Real Madrid, Manchester City leh Bayern Munich ten hma hruai lova Villa in hma an hruai hi thil mak tak a ni ve hrim hrim.
Vawi hnih chak zawn tawh Aston Villa hian an mualah khel tha viau mah se chawlhlawk hmain goal an thun thei bik lo. Chawlhlawk hmaa goal thun thei an awm loh hnuin chawlhlawk hnu lamah Villa in goal an thun ta thuai thung. Aston Villa player senior ber John McGinn chuan minute 55-naah hmahruaina goal a thun a. Hma an hruai hnuin Jhon Durán chuan minute 64-naah an goal hnihna a thun belh zui leh zat a, an hmahruaina a tiau. Italian club Bologna hian hun tawp thlengin an si phurh an sut thei lova, Villa Park-ah si hnih faiin an tlawm.
Unai Emery hnuaia hmasawn tawk Aston Villa hian UCL season tharah vawi thum khel tawhin an la chak vek. An chak vek a ni satliah mai lova goal chhuah an la nei lo. UCL game hmasa pathuma chak vek a, goal chhuah lo team pahnih Malaga leh Leicester City te hnung an zui.
Aston Villa hian 24 October 2022 khan Steven Gerrard thlaktu atan Arsenal manager hlui Unai Emery an la lut. Emery hnuaiah Villa in hma an sawn chak hle. Champions League khel tura an tlin tak hial bakah season 26 hnu lamah EPL a bul an tan that ber hun an tawng ta hial a. EPL-a an chet that rualin Champions League hmahruaitu an ni ta hial bawk.
Arsenal an chak
EPL season tharah a vawi khat nana tlawm Arsenal chu Champions League lamah an insiamtha a, an mikhual Shakhtar Donetsk chu 1-0 in an hneh. Arsenal in Shakhtar Donetsk an hnehna goal hi Dmytro Riznyk own-goal a ni thung.
An mualah an chak tum hian Arsenal defender Riccardo Calafiori chuan hliam a tuar a, Arsenal lawm a kim lo hle. Arsenal hi hliamin a tibuai mek a, captain Martin Odegaard leh Bukayo Saka te hliam vangin an chawl mek a. Defender Jurrien Timber a inhliam bakah Calafiori a inhliam ve leh bawk. Inelna liana champion tum Arsenal hi hliam vangin a ngui rih hle.
PSG an chak zo lo
UCL season thara bul tan tha lo Paris St-Germain chu an mualah an chak zo lova, an mikhual PSV Eindhoven nen 1-1 in an inhnehtawk.
Parc des Princes a lenglut PSV tan hian Noa Lang chuan minute 34-naah hmahruaina goal a thun a. Mualneitu PSG tan hian Achraf Hakimi chuan minute 55-naah goal thunin an si phurh a sut. Hun tawp thlengin goal thun belh thei an awm lova, PSG hi an mualah an chak zo ta lo a ni. An mualah an chak zawh loh vangin PSG hian UCL season tharah vawi thum an khel tawh a, point li chiah hmuin 17-naah an awm mek a ni.