Champions League khel tur United
May 3, Pathianni zan khan English Premier League 2025-26 khelh chhunzawm a ni a. Old Trafford a inkhel hmuhnawm takah Manchester United in an hmelma lian Liverpool an hneh a, season tharah champions league khel turin an tling. Inkhel dangah Aston Villa muala chak Tottenham Hotspurs in relegation zone an chhuahsan ve bawk.
United 3-2 Liverpool
Old Trafford-a an mikhual Liverpool lakah Manchester United in bul an tan tha a, first half an awpbet. Hma takah goal hnih thunin an khingpuite thunun hneh viau mah se second half tir lamah an talbuai a, an tihsual vangin goal hnih an chhuah zawn ve thung. An tihsual pawi tak atanga insiamthain goal 5 luhna inkhel hmuhnawm takah Kobie Mainoo goal thun hmangin hnehna an chang a, season tharah champions league an khel phak dawn tih a chiang zui nghal.
United hian chak ngei tumin an hmelma lian Liverpool an nawr a, Liverpool in corner atanga ball kal an thenfai hleitheih loh vangin United tan Matheus Cunha chuan box pawn atangin a pet goal a, minute 6-na lekah hmahruaina goal a thun. Cunha pet tha pangngai tak hi Reds midfielder Mac Allister-a’n a lo dang per bawk si a, si ngak Woodman tan dan ngaihna a awm lo.
Hma takah goal an thun vangin United an phur a, goal pawh an thun belh leh thuai. Bruno Fernandes ball vawrh luh hlauhawm tak chu si nghak Woodman chuan lo khawih hman mah se Benjamin Sesko dulah a khawih per a, an lamah a lum lut ta tho thung a. United in beiseina sang tak nena an lak luh Sesko chuan vanneihthlak ang reng takin minute 14-naah an goal hnihna a thun a, an hmahruaina a ti zau. Cunha leh Sesko goal thun hmangin United hian 2-0 a hmahruai chungin chawlhlawk an hmang.
Chawlhlawk hmain game thuhnun hneh viau mah se chawlhlawk hnu lamah United chesualin goal hnih an chhuah zawn a, game a inthlak danglam hlawk. Second half tan atanga minute hnihna lekah Amad Dialo tihsual vangin Dominik Szoboszlai chuan a khalh tlang a. Cool leh fin takin Szoboszlai hian goal a thun a, an si phurh a sut then.
Hma taka goal an thun hian Reds a fuih phur viau a, thothang tha zawkin an inlan zui theih phah. An tihsual hnu lawkah United an chesual nawn leh a, si nghak Senne Lammens ball pek sual vangin Liverpool in hun tha an nei a, Cody Gakpo chuan minute 56-na lekah goal thunin an si phurh a sut zo. Reds goal hnihna thuntu Gakpo khan United a ngam viau a. United nen an intum hnuhnung vawi ngaah goal li ngawt a thun a, EPL-a club zinga a ngam deuh ber chu United hi an ni.
Goal hnih ve ve an thun hnuin inkhel a hmuhnawm zui viau a, Liverpool in chak tumin tan an khawh nasa hle. An hun tha neih an hlah ve ve hnuin United an che fuh leh ta nge nge. Liverpool tlarhnung in ball an thenfai theih loh an tuar. Reds ball thenfai theih loh hi Red Devils midfielder Kobbie Mainoo tan pet nuam tawk chauhin a tla a, Mainoo hian minute 77-naah fuh zetin a pet goal a, hma an hruai nawn lehna goal a thun. Manoo goal thun hi Liverpool in sut tum viau mah se an hlawhtling zo tawh lova, an hmelma lian United lakah an tlawm nawn leh. Season kal mekah United hian Liverpool hi Anfield-ah an lo hneh tawh a. Old Trafford ah hneh nawn lehin kum 2015-16 a an hneh zawn hnua Liverpool an hneh zawn leh hmasak ber tum a ni
Spurs an him rih
Pathianni zana inkhel dangah Villa Park a lenglut Tottenham Hotspurs chuan hnehna hlu tak an chang a. Inrinni zana tlawm West Ham United an lehpel a, relegation zone chhuahsanin an him rih.
Spurs hian Villa lakah bul an tan tha viau a, minute 25 chhunga Conor Gallagher leh Richarlison te goal thun hmangin hma an hruai reng am goal khat chhuah mah se an chak ta tho a ni.