Champions league Last 16 draw
December 13, Thawhleh zan khan UEFA Champions League 2023-24 group match khelh zawh a ni a, last 16 lut tur kan hre kim thei ta. Last 16 a intum turte hi kar leh thawhtanniah pawh fel a ni dawn a. UCL Last 16 draw tur kan thlir zau ang.
Group match khelh zawh takah champion lai Manchester City leh vawi 14 zet champion tawh Real Madrid te chu chak vek chungin last 16 an lut. Premier League club atangin Arsenal leh Manchester City te group champion ni chungin an tlang a. Manchester United leh Newcastle United te group mawngphah niin an tla ve thung. Premier League club te chet that dan leh chet chhiat dan a inkhai rual lo hle.
UCL Last 16 a intum tur pawh naah hian intum thei lo tur an awm nghal a. Pakhatnaa chuan group champion ni chunga tlang team pariatte an intum thei dawn lo phawt a. Ram khat club te an intum theih loh bakah Group stage-ah group khata lo awm tlang tawhte an intum thei dawn lo bawk.
Heng club club pariat; Arsenal, Atletico Madrid, Barcelona, Bayern Munich, Borussia Dortmund, Manchester City, Real Madrid leh Real Sociedad te hi group champion an nih vangin an intum thei dawn lo phawt a. Pahnihna; Copenhagen, Inter Milan, Lazio, RB Leipzig, Napoli, Paris St-Germain, Porto, PSV Eindhoven te an intum thei dawn lo bawk. Group A-ah Bayern Munich leh FC Copenhagen te an intum thei dawn lo va, Arsenal leh PSV an intum thei dawn lo bawk. Chutiang bawkin Real Madrid leh Napoli, Real Sociedad leh Inter Milan, Atletico Madrid leh Lazio, Borussia Dortmund leh PSG, Manchester City leh RB Leipzig leh Barcelona leh FC Porto te an intum thei danw lo bawk.
Arsenal in PSV chhiah an tum thei dawn lo a, khingpui nem zawk pawt fuh thei an nih laiin Inter Milan emaw, PSG emaw hmachhawn thut thei an ni thung. Team lian hrang hrangte group champion an nih thup vangin last 16-ah hian inkhel ngaihven hlawh a tam hran dawn lo niin a lang a. Champions league a nih miau vangin inkhel hmuhnawm tak a ni vek thei tho thung.
UCL Last 16-a intum turte hi January ni 18, Thawhtanni khian Nyon khawpui a House of European Football-ah pawh fel a ni ang. Last 16 first leg hi February 13-14 leh 20-21 ah khelh a ni ang a. March 5-6 leh 12-13-ah second leg khelh a ni thung ang.