Champions League play-off thlirna

Champions League play-off thlirna
Thawhlehni zan khan Uefa Champions League knockout round play-off first leg match li khelh niin, nizan result tarlan hman lohah match li dang khelh chhunzawm leh niin, a zan hmasa zawk inkhel thlirkual thuak thuak teh ang.
Manchester City 2-3
Real Madrid
Europe thleng thlengin Premier League champion an talbuai chhunzawm zel a, Etihad Stadium-a mipui 52,081 pungkhawm hmaah goal thun hmasa zawk mah se kum 24-a upa Norwegian Erling Haaland-a goal hnih tihluh hmangin tlawm an pumpelh zo lo!
Norway international Haaland hian minute 19-na lekah mualneitu team tan goal hmahruai thunin, half time-ah Spanish club-in an siphurh an sut zo lo.
Darkar khat an khel tling chiah tihah Kylian Mbappe chuan Bernabeu club siphurh sut mah se hun tawp hma minute 10 la awmah penalty atangin Haaland bawkin City hmahruai nawnna goal a chhuihlut leh a; minute li la awmah Brahim Diaz chuan Real siphurh sut ve lehin, team pahnih hi an inhnehtawk thei mai dawna a lan hnu hun pekbelh minute hnihna a kal mek laiin Jude Bellingham chuan Carlo Ancelotti team chakna goal hlu tak a khung zui ta a ni.
Pep Guardiola leh a naute kha last 16 luh an tumna kawngah anhmabak a hautak ta hle a, karleh February ni 19 khian second leg khelin Bernabeu an lut dawn a, mahni kawtkaiah pawh tlawm pumpelh zo lo an nih avangin Spain rama erlet tum chu a hautak ve khawpin a rinawm!
Juventus 2-1 PSV
Inkhel dangah Italy rama zin chhuak Dutch-ho an tlawm a, mahse, second leg chu an kawtkaia khelh tur a nih avangin English-ho aiin beiseina an la nei sang deuh mahna!
Allianz Stadium-a Juve goal hmahruai hi darkar chanve khelh pelh hnu lawka Weston McKennie tihluh niin, a hmuna mipui 39,886 fuankhawm thawm a tha ngang mai!
Second half minute 56-ah Ivan Perisic chuan PSV siphurh sut bawk mah se hun tawp hma minute riat la awmah Samuel Mbangula chuan Juventus chakna goal a khung a, PSV tan Champions League knockout phase play-off second leg a khirh sauh thei.
Group phase khelh zawh taka 20-na Italian team khan bul an tan nuamsa zawk a, a tir lamah Nicolas Gonzalez, Kenan Yildiz leh Paris St-Germain loanee Randal Kolo Muani-te’n goal khungna hun remchang an hmu hlawm a, an hlawhtling lo mai chauh a ni!
Tun kha Champions League season kal laia club pahnih intum vawihnihna niin, group phase-ah pawh khan 3-1-in Juventus an lo chak tawh a, chuvangin, February ni 19-a Philips Stadion second leg pawh hi Dutch-ho tan chuan a huphurhawm thei mai awm e!
Thawhlehni zan Uefa Champions League – knockout round play-off first leg inkhel dangah Borussia Dortmund chuan sithum faiin mualneitu Sporting CP anhneh ve bawk.
Tun kha an manager thar Niko Kovac hnuaia an game hnihna leh an vawikhat chakna ni nghalin, February ni 19 tho khian Dortmund hian return leg-ah Sporting hi an mikhual ve thung dawn a, chak leh tura ngaih ngheh loh an har khawp ang!
Paris St-Germain pawhin Thahwlehni zan vek khan sithum fai bawkin mualneitu Brest an sawp.