AIRPORT HMASA BER

JC.Zoremi Hmar Joute
1900 hma lamah kha chuan Thlawhna hi an la hmu chhuak lo va, hemi kum hian thirsakawr siam thin Wright Brothers an tih ten an siam chhuak ta a, 1914 indopui 1 naah kha chuan an hmang nasa viau tawh. Kan pu te ho, German ral runa France ram han kal te pawh khan an hmu ve hlawm a ni. Mahse khatih laia, fighter bomber ho kha an la thlawk muang hle, theihtawpa chaka an han thlawh ve pawh khan 120 kmh vel bakin an thlawk thei meuh lo. A siam chhuak nasa ber pawh, The Dutch aircraft manufacturer an ni a, Fokker kan tih ho kha, anni siam chhuah hi a ni.
Indopui 2na a lo chhuah kha chuan fighter ho kha an thlawk chak tawh hle, japan thlawhna sipai ho hman,The Nakajima Ki-84 an tih ho kha darkar khata km 650-a chakin an thlawk thei tawh a ni.
Aircraf industries chu a thang chak ta em em mai a, tunlaia khawvel thlawhna thlawk chak ber nia an record chu, America siam, NASA X-43A an tih kha a ni, a thlawh chak dan em em kha a rapthlak zawk! Mach 9.6, or 7,366 miles per hour (darkar khata km 11854.428 a chakin zu han thlawk thei a mawle! Tun lai Russia hypersonic missile thlawk chak chi (mach 10) nen an intluk deuh reng tihna a nih chu.
Thlawhna hi nei thei teh reng pawh ni ila amah tluk thoa neih tel ngei ngei ngai a awm a, chu chu Airport kan tih ve tak fo hi a ni. Khawvel airport hmasa ber thlawhna tum leh thlawhchhuah nana an siam hmasa ber chu, College Park Airport an tih America ram bung pakhat, Maryland ami khu a ni an ti. 1909 khan Wright Brothers ten sipai officer ho thlawhna khalh zirtir nan an siam a ni. hetah hian America sorkar thlawhna sipai pilot hmasa ber pahnih ten khalh an zir a ni.
Thlawhna chuan a thlawh chhuah dawn leh tum dawnin tlan kawng (runway) thui tak a mamawh a, thlawhna len leh tet rih dan azir zelin tlan kawng pawh hi a thuiin a tawi thin. A tlangpuiin thlawhna te ber tum theihna, ft 400 atanga ft 18,045 (metre 5500) an ni tlangpui. Thlawhna tum hmun tam zawk hi ft 3,300 atanga ft 8800 a tam ber; hemi chung lam hi chu international Airport kan tih ang chi hi an ni hlawm a, Lengpui Airport hi metre 2500 vel a ni a, metre 2000 dang belh leh thei ta ila Boeing 747 an tih leh Dreamliner, A380 (Airbus) ang chi te pawh an tum ve thei dawn a ni. Hetiang thlawhna lian ho hi chu an rit em em mai a, tones 500 chuanga rit te an ni hlawm a, a tlan kawng pawh nasa taka chhut muk a tul tawh a ni. Heti hi ni mah se, ram hausa, phaizawl nei tha bawk si tum hmun siam awlsamna ramah chuan tum kawng hi zau pui pui sei tak tak, a sei zawng bithliah awm lo vin an siam kawkalh seng sung mai thin a ni; a zau zawng pawh metre 250 laia zau te a ni thin. Khawvela tum hmun zau leh sei pawla an sawi pakhat chu, Edwards Air Force Base California USA a mi chu a ni, ft 39,098 laia thui niin, ft 899-a zau a ni bawk, a thui zawng hi km 12 deuh thaw a tling, an sawi danin. America-ah khu chuan State ramri khawi maw lai berah khuan, kawngpui ngil tha bik rikrum thila thlawhna tum mai theihna tur an siam vek a, a rukin thlawhna tum hmun an nei thliah thluah mai a nih chu.
Tin, Thlawhna tum hmun hi ralthuam chikhata chhiar tel a ni ve hrim hrim, tu ram emawin, indona atana hmanrua an ngah dan tehfungah thlawhna tum hmun sipai ten an hman nghal mai theih hi a tel a, tuna Mizoramin kan neih Lengpui Airport pawh hi India Airforce ho hman mek, fighter ho tan chuan duhthusam a ni, tehkhin nan China nen lo inbei dawn ta se, hmar chhak airport ho hi chu, kan phal leh phal loh lam ngaihtuah si se lo vin an duh duh an rawn hmang hmiah hmiah mai dawn a ni. Tin, China lam pawhin heng hmar chhak airport te hi chhut chhiat an rawn tum ve nghal zat bawk ang.