Champions League quarter-final hnuhma

Thawhleh zan leh Nilaini zan khan UEFA Champions League (UCL) quarter-final thawhkhatna khelh a ni a, rinlawk loh tak result a awm a, rinlawk loh taka mimal chetha ta riau te pawh an awm. UCL quarter-final thawhkhatnaa mimal leh club anga hnuhma thar kan hrut kual leh thuak thuak ang.
Declan Rice
Thawhleh zan khan Arsenal chuan an mikhual Real Madrid chu 3-0 ngawtin an lo sawp. Hei hi rinlawk loh result zinga langsar zual a ni. Champion lai Real Madrid laka an chak tum hian Arsenal midfielder Declan Rice a chetha viau a, mawi turu zetin free-kick tum hnih ngawt a chhuih goal. Rice hian free-kick a chhuih goal vawi khatna a ni a. Champions League knockout stage – macth khata direct free-kick vawi hnih chhuih goal hmasa ber a ni tel nghal bawk. Rice hi season 15 zet liam ta chhungin UCL match khata free-kick vawi hnih chhuih goal thei pathumna a ni a. UCL-ah hian game khata free-kick vawi hnih chhuih goal thei panga chauh an la awm a, chungte chu; Rivaldo, Cristiano Ronaldo, Neymar (PSG), Hakim Ziyech leh Rice te hi an ni.
Real Madrid
Champions League-a chetha tlat thin Real Madrid hi UCL KO stage first leg-ah bik tlawm nei lovin vawi riat ngawt an lo kaltluang tawh a, KO stage- first leg-ah bik tlawm nei lo zawn rei ber an ni a. He an record tha tak hi Arsenal in an thaichhiat sak ta a ni.
Real Madrid hian season kal meka inelna hrang hrangah an khelh hnuhnung vawi kuaah goal an chhuah hmasa vek a, 2019-ah goal an chhuah zawn rei record an siam a, record duhawm lo zawk siam thei dinhmunah an ding mek bawk.
Arsenal leh Real Madrid te hi vawi thum an inhmachhawn tawh a, Arsenal vawi hnih chakin vawi khat an in draw tawh a, Real Madrid hian Arsenal an la hneh ngai miah lo ve teh tlat.
Lautaro Martinez
Inter Milan tan Lautaro Martinez a chetha chhunzawm zel. Martinez hian 2-1 a Bayern Munich an hneh tumin goal khat a thun a, Inter Milan tan UCL-a goal thun zawn rei Ademola Lookman record a nih rual a, game li chhung goal a thun zawn tawh. Martinez hian Inter Milan tan UCL knock out stage-ah bik goal 5 a thun tawh a, Inter Milan tan UCL KO stage-ah bik goal thun hnem pahnihna a ni a, a chungah hian goal sarih thun tawh Diego Milito a awm mek.
Thomas Muller
Bayern Munich player ropui leh player rinawm Thomas Muller chuan Inter Milan lakah goal khat a thun. Muller hian champions league-ah goal 57 a thun tling ta chiah a, UCL-a goal thun tam lama parukna Ruud van Nistelrooy record a nih rual. Muller hian UCL KO stage-ah bik Bayern Munich tan goal 28 a thun tling tawh a, UCL KO stage-ah Bayern tana goal thun hnem ber a ni.
Raphinha
Season kal mekah FC Barcelona tana khel tha tak Raphinha chuan 4-0 a Borussia Dortmund an hneh tumin hmahruaina goal a thun. Raphinha hian UCL sason kal mekah goal contribution vawi 19 a nei tling tawh a, Barcelona tan UCL season khata goal contribution ngah ber Lionel Messi record a nihrual a. Player ropui Lionel Messi record khum theihna hun tha tak a la nei zui bawk.
Raphinha hi Brazil player zingah UCL season khata goal contribution ngah ber a ni thar a, Roberto Firmino (18) a khum. UCL season khata goal contribution ngah ber chu Cristiano Ronaldo (11) a ni a. Raphinha hian Ronaldo record khum tumin tan a khawh zui leh ang.
Barcelona tan Raphinha leh Robert Lewandoski te an inkawp fuh hle a, anni inkawp hian UCL season kal mekah goal 21 (Raphinha 12, Lewandoski 11) an khung der tawh. Momahed Salah – Roberto Firmini leh Lionel Messi – Neymar te hnu lamah tlarhmaa inkawp player pahnihin UCL-a goal 10 chung lam ve ve thun leh thei hmasa ber a ni nghe nghe.
Lamine Yamal
Borussia Dordmund an hneh tum hian FC Barcelona rawlthar duhawm Lamine Yamal (kum 17 leh ni 270) chuan goal khat a thun. Yamal hi kum 18 tlin hmaa UCL KO Stage-ah goal khat aia tam thun thei hmasa ber a ni a. Champions league-ah a zawna goal thun thei naupang ber a ni tel bawk. Rawlthar zingah Yamal aia UCL-a goal thun hnem awmchhun chu goal ruk thun tawh Kylian Mbappe a ni.
Robert Lewandoski
FC Barcelona forward Robert Lewandoski chuan champions league KO Stage-ah goal 34 a thun tlingin goal thun tam zual pathumna niin Karim Benzema goal thun zat a tluk a. An chungah hian Ronaldo (67) leh Lionel Messi (49) te an awm.
Lewandoski khelhna FC Barcelona hi 2025-a inelna hrang hrang an hmachhawn tawh vawi 23-ah tlawm an la nei lova, Calender year-ah tlawm nei lova an kal tluan rei ber tum club record an nihrual ta chiah a, record thar siam theihna hun tha an nei mek bawk