K.Hmingthankaia
-- Advertisement --
Ka testimony angreng pakhat, hmana Makedonia-a chhuak, ‘Ka thu ziahte hi’ tihah khan, “Thih ka hreh chhan ber chu, thih hnua ka kalna tur lam ngaihtuah aiin, ka mihringpuite hnena thuziak engmah ka hnutchhiah lo tur hian min tilungngai a ni” ka ti.
Hman deuh, 7.6.2024 khan, chanchinbua thuziaktu ngai reng hmuh ning an awm thu chanchinbu-ah tho hian kan hmu. An sawi dik tih hi zaa zain ka pawm bakah, chung an nin zinga no. 1. chu keimah ka ni tih hi zaa zain ka pawm bawk. A chhan chu, ka thu ziak ve thin atang hian engmah thu ropui, thuril emaw, hriat belh tur leh zir tur, hmasawnna leh tangkaipui tur tu tan mah a awm lo. Thu ngaihnawm leh lunglenthlak lah a awm hek lo. Thu fahrah te te leh local deuh deuh hi, tawngkam mawi lo tak tak, bung tak tak leh rum deuh deuh hian, zak mang hlei lo hian ka aupui ve mai mai thin vang a ni.
‘Mahse’, ti tlat teh ang aw. Min lo ning lo hram teh u. Ziaktu hi kan inang lova. Keimah ang hi an lo awm ve takin, ‘kan’ ka ti zel teh ang. Kan dinhmun hi a inang vek lo a ni. Mi ril, mi thiam, mi taima, hriatna zau leh mi turu tak tak an awm laiin, keini a level hniam te dinhmun pawh hi min hriatthiampui teh u.
|henkhat chu kan vanglai pel tawh, kan thatlai leh vullaia thil eng eng emaw kan lo tawn tawh leh tih ve tawh angte kha ti thei tawh si lo, mahse, rilrua eng eng emaw la langkual zut zut si avanga enge maw ti tala puakchhuah duh ve vangte kan ni a. Mihring pangngai tawh phawt hi chu, thlan khura kan luh hma hi chuan enge maw pawimawhna leh tih tur nei ve tlata inhria, tih tur leh pawimawhna tur zawng theuh kan ni. Amaherawhchu, tha leh zung sen ngai chu engmah tih theih nei ve ta lo chu, kan rilrua vei zawng leh ngaimawh leh helhkamte chu, kan phak tawk tawkin kan ziak ve ta mai thin a ni.
|henkhat kan thatlai leh vanglai, kan chaklai ten min kiansan mek a, kan rilruin a zuam ang kan ti thei tawh si lo. |henkhat kan vullai leh vanglaite chauhin min liamsan lova, min hnemtu kan thenrualte leh kan kawppuite ngeiin mual min liamsan tawh si a. Tunhma angin thenrual pawl turin kan teihawi thei tawh si lo. In chhungkhurah kan tu leh fate kan rilru milpuia kawm theih awm bawk si lo chu, kan lungleng leh kan khawhar hunawl hnawhkhah nan, kan thluak, kan mit leh kan kut chak tawh lo chung chungin, ziahna hmanrua kan hman theih ang ang chu thiam lo chung chungin, theihtawpin muangchangin kan puitlin ve hram thin a ni tih hi min hriatthiampui phawt chuan; in mi ninna hi a iaawm deuhin ka ring.
Mi tin hian kan vei zawng, kan thil tih duh leh kan helhkamte hi rilru nasa tak senga, harsa taka kan tih hlawhtlin theih hi chuan kan lawm em em vek thin a nih hi. Hetia kan theihtawpa kan han ziah ve ngar ngara, kan ziah zawha, chanchinbua kan han thawn meuh hi chuan kan thaw huaia, kan lawm veng veng ve thin asin. Khawvel mihring ngaihpawimawh ber chu ama hming a ni, an lo tih thin angin, chanchinbu kan han bih dek dek a, kan hming a lo awm ve kalh mai hi chu kan hlimin kan lawm ve thei teh ania. Kan dam sawng sawng a, kan hriselnate hian a that phah sawtin, kan dam rei phah sawtte hian ka ring thin.
Hnam pui lung fing hoin, ‘Thu leh hla, Literature chu, mahni nihna ni miah lova mi dang hnena inlantirna, a taka kan nungchang leh kan tawngkam ang ni lo, kan tih dan leh kan rilru dik tak leh ngaihtuahna dik tak ni si lova lanchhuah tumna, kan mize dik tak thupa hmaithinghawng vuah chunga thu ziah a ni e’ an lo tih hi a dikna chen chu a tam khawp mai. Mahse, keini ang ho hi chuan thil hi a nih dan ang ang leh kan hmuh dan ang ang leh, kan ngaihtuahna ang anga ziah phawng phawng hi kan ching zawk mah a ni. Kei ngat phei hi chu mi thinchhia leh mi hauh hmang, tawngkam mawi hmang thiam lo leh hmang hreh, sawi fawk fawk leh, mi hnuaichhiah leh chungtlak taka tawng ching ka ni. Thu ziah chu inthup chunga ziah a ni, an tih angin, enge maw chen chu insum mawi nem der vel ve mah ila, ka thu ziah leh ka tawngkamte hi a mawi loh theih em hi. Mahse, thil hi a nihna ang tak, kan hmuh dan ang tak, kan rilrua a awm dan ang tak leh, keimahnia a thawh dan ang taka, keimahni style-a sawichhuah kan tum dan ang chiaha ziah hian, kan rilrua kan vei ang tak leh kan sawi tum kan sawi thei a, kan thawveng hawk a, ziahman a awm zawkin ka hre thin. Tin, mite thinlungah a fiah zawk bawkin ka hria.
Min lo ning viau a nih pawhin, keini ang duang hi chuan in nin turin rei pawh kan ziak peih tawh lo anga, ziak tur pawh kan awm lo thuai ang. Ziaktu ropui leh ropui lo pawh, mihring tawh phawt chu kan liam zel a nih hi. Thil ninawm ziaktu nge, a ningtu liam hmasa zawk dawn tih lah tuman kan hre hek lo.
Amahrawhchu, thuziak tha tak tak chhuah tur a tam tak em avang hian, phurna tla hniam ve zel nen, lo inrawlh hnawk buai ve tawh lo mai ila ka ti deuh a. Mahse, la dam ve tek tek na na na chuan, chhunglam atanga turtu lo awm ve reng bawk si chuan, thu mawlmang tak tak leh thu local deuh deuhte chu, tawngkam hawihhawm lo deuh deuhin kan la rawn mualphopui leh nge nge mai thei bawk. Editor-ten an phal chuan.