CHANCHIN |HA HRIL LEH RAM CHANGKANNA SUIHZAWM A |UL TAWH

Rev Dr Ramengliana
General Secretary, NEICC

Nimin piah January 11 khan state holiday meuh puangin ‘Missionary Day’ kan hmang a. Kan pioneer missionary te hlutzia leh khawvel pumpuia Chanchin |ha hril tur kan nihziain rilru a hneh thar hle. Chanchin |ha hlutzia leh hril hna pawimawhzia inzirtir hi a tul reng a, thangthar mi tha an inpek zel a ngai. Tun hnaiah hian kan uar tawk ta lo emaw a tih theih hial a. Pathian khawngaihna avanga kan kawl Chanchin |ha hi khawvelin a mamawhzia a dinhmun en hian a chiang viau thung a ni. Chutih lai reng chuan he thil hlu ber kawltute hian kan thil kawl hi kan rula raw neih mai mai emaw tih theihna chhan tam tak a awm. Talent khat dawngtu anga utawk tur vawn ve ngawt hi Chanchin |ha nihphungin a kalh a, Chanchin |ha hrilin a ngeih loh ber a ni dawn si a. A nih tur ang tak hi ni zo sela chuan kan ram leh hnam hmel pawh a tidanglam uar uar tur a ni sia.
1. Man fuh a har a niang e
Chanchin |ha hi kan ram leh hnam lipse vektu tur a ni tih hi man fuh harsa kan ti thin khawp mai. Kan sorkar policy kaihruaitu tur leh kan eizawn dan piah lamah kan hnathawh dan zawng zawng luan chhuak a, chiah zawp vektu tur a ni tih hi kan piantharpui hleithei lo. Pathian Thu kan duh chin pawh hi kan mimal harsatnate min sut kian saktu leh kan inchhung buaina min lak kian saktu ang vel atan a ni ber a. Kan ni tin hna, kan chhungkaw policy, kan thawh ber tur thil min hrilhtu atan a ni tih kan hre hleithei lo a ni ber e. Hemi kawngah hian Setanan hlawhtlinna ruam a la ngah a ni mai thei. A awm ve tho mai. Kan mit tivai tur hian a tang nasa dawn em!
Chik takin han thlir ila tunhnaia kan ‘harhna’ hlimpui tak takte pawh hi min tihlim thar leh boruak thar min pe thil an ni deuh mai emaw tih theih a ni a. Heti chauh pawh hi ni se hlu tak an nih dan phei chu a awm ngei e. Mahse harhna dik tak kan ni tin nun min tihdanglamsak vektu leh kan ram hmelhmang tidanglam dawrh zo kan mamawh ta a nih hi. I tawngtai nasa ang u. Thlarau Thianghlim hnathawha kan ngaihte pawh min tihlim er er leh min lamtir mup mup zo boruak nu angreng tak te a ni tlangpui tawh a. Finna leh thahnemngaihna, thianghlimna leh remhriatnaa min thuam theitu leh ram tihhmasawnna kawnga min hruai zotu thlarau lam a ni pha meuh lo. Ram siam tha dawrh zo harhna kan mamawh a nih hi!
2. Chanchin |ha nena inmawi ram
Kan ram hi Chanchin Tha nen a inmawi em? tih zawhna hi kan chhan theuh a tul a. A dikna kan hriat a ngai! Nikum inthlan campaign hlapuia ‘corruption’ kan sawi hluar lutuk te kha ka lo ip deuh chawih chawih a. Kan uar ta mah mah em ni ang? Kan Governor zahawm takin Assembly a address-na hmasaah ‘corruption’ tihbo a tulziate a sawi vak mai kha – a ni Kristian pawh ni lem lo min hriat dan tur chuan a va han duhawm lo em! Mizoram hi state dangte ang em ema ‘corrupt’ ang chuan ka la pawm phal hauh lo mai. Mahse, kan tih tur tak hi kan la tifuh hlei thei lo niin ka pawm nghet hle thung.
Chanchin |ha chu ‘chatuan nunna’ thu a ni a. He khawvel piah lam zawm nun a nih miau avangin he khawvel tehfung ringawt chu a tawk hauh lo vang. Chutih laiin chatuan atan pawha thu hlu tling chu he lei atan phei chuan a hlutna phawh chhuah sen loh a ni ngei ang. Chanchin Tha hmel mawi lang pha mumal lo leh lang hleithei lova kan ram a la awm a nih chuan a bul atanga kan zir that a tul a ni zawk ngei ang. Kan lo hriat dan a ningnelin a kim lo deuh pawh a ni mahna. Tunlai tehfung atanga teh thiamten teh sela Chanchin |ha nena inmawi ram kan la nei si lo va. Hemi hre phak ram hruaitu, Kohhran hruaitu, khawtlang hruaitu kan va mamawh tak em!
3. Suihzawm a ngai
Chanchin |ha leh changkanna, Pathian Thu leh ram hmasawnna kan suihzawm a tul tak tak tawh a. Hetiang ti lo hian kan intihlim rei ta mah mah a nih hi. Kristiante chuan ‘changkanna’ a nih vang ngawr ngawrin kan um tur a ni lo va, ‘hmasawnna’ ngawr ngawrah kan lungawi thei lo vang. Amaherawhchu, he India ram, Hindu 80%, Muslim 15% a nihnaah hian Kristian ram chu an mithmuha ‘changkang’, an hriat dana ‘hmasawn’ a nih a ngai. Chu chuan kan Chanchin |ha hril hnaah sawhkhawk a nei ang. Kan Chanchin |ha hlimpui leh hril hi a tha tak tak em tih chu kan ram nihphung an rawn enin an hre mai dawn a ni. Keini pawhin Chanchin |ha hlutna hi a van kai leh kai loh, thih hnu piah lam chauh a ni lo tih kan pawm thiam a ngai. Kan Speaker ten hengte hi sawi zel teh se!
‘Kristiante chu kan khawsak a nuam tur a ni,’ ka ti mawl tawp lem lo. Tunlai American Prosperity preacher ho angin hausakna/hriselna leh Isua Krista hnungzui ka suihzawm thiam hauh lo. Mahse ka sawi hi chu Kristian ramah hian midangte hma an sawn theih nana hnathawh hi a awm tur a ni, mahni inchhekarbawm aiin midangte ‘changkanna’ buaipui hi a tam tur a ni, ka tihna a ni zawk. Thlarau leh taksaa midangte tana malsawmna nih kan buaipui chuan ramin hma a sawnpui lo thei lo. Chutiang ram, ‘khawizu leh hnute tui’ luanna ram kan din hunah chuan kan Chanchin |ha hril an bengkhawn ngei ang le. 1800/1900 chho va Europe rama missionary tirh tau a teh a, kan ram kilkhawr ber pawh a rawn thlen, a hlawhtlin em em chhan kha maw – Europe kha khawvel ram zawng zawng chung en thup an nih pakhat vang a nih ka ring tlat. Kristianna hmel an titha a, ram hmasawnna leh Chanchin Tha an suihkawp thiam vang a nih pakhat kha maw.
Eng tak sawi ang maw le?
Missionary rawng thleng hmasa William Williams te, rawn chamchilh hmasa Pu Buanga leh Sapupa te hian tuna kan dinhmun hi rawn hmu nge eng tin nge aw min fuih hlawm ang? Han zeldin chhin ta ila: “Zofate u Chanchin |ha hril zel rawh u aw…Chanchin |ha chauh hi Pa hnen kan thlen theihna tur thu awmchhun a nia. Hre lote hriattir zel ang che u. Amaherawhchu, tunlai khawvel inpawhtawn tha takah hian intirh chhuah mai leh inhrilh ngawr ngawr chauh hi a tawk tawh lo a nia. Miin an hre chiang tawh si che u a. Chanchin |ha nunpui ram in nih a ngai. Mizoram kha ringlote chung en khawpa ‘hmasawn’ leh ‘changkang’-a insiam a ngai. Chanchin |ha hmel in ni si a. In ram leh in nunah khawvelin in Chanchin |ha kawl rah leh a hlutna an hmuh a ngai. Chanchin |ha leh ram hmasawnna hna hi lo suihzawm tawh rawh u,” an tih i ring em le? Kei chu ka ring deuh roh tlat a ni.
“…our proclamation has social consequences as we call people to love and repentance in all areas of life. And our social involvement has evangelistic consequences as we bear witness to the transforming grace of Jesus Christ.”
(The Cape Town Commitment, 2010)