Chanchin lawmawm – Aikal lak tawp

Mizoram sawrkarin a hnuaia thawktea aikal lak tihtawp a tum chu an chingfel thawhkhatah an ngai tih department of personnel & administrative reforms minister K Sapdanga chuan a sawi a. Sawrkar officer-ten sawrkar thuchhuak an bawhzui tha a, Mizoram sawrkar hnuaia aikal la zawng zawngten aikal lak titawpin an hna an zawm kim tawh, tih chu tuna report an hmuh dan a ni tih sawi in, report dik lo pe an awm a nih chuan, puan lawk tawh angin, controlling officer-te mawhphurhna a ni ang a, departmental proceeding hial lak a ni ang, tiin a sawi bawk.
Mizoram sawrkar thar apiangin aikal lak hi an buaipui vek a, mahse titawp thei an awm lo. Tuna sawrkar thar hian kum khat pawh an la sawrkhar hmain aikal lak an titawp hman, tiin a sawi theih awm e. Tuna ‘report dik lo pe an awm a nih chuan…’ tih hi chu, han sawi tham a ni tawh lo a, ‘aikal lak titawp’ tia sawi theih a ni tawh mai awm e.
Sawrkar hmasate khan aikal lak tihtawp tuma tan an lakna kawngah, office memorandum atangte pawhin bul an tan ve thin tho a, mahse tun anga aikal lak han tawp deuh thuap ta ang hi hriat tur a awm lo niin a lang.
Aikal awm zat an survey dan chuan mi 3365 an awm a. Sawrkar hnathawk tura rawih ni ve miah lo mi heti zat hian, sawrkar hnathawk tura rawihte thawh ai an han thawk suau suau mai a ni a, sawrkar thuruk, file pawimawh etc. tan pawh a him dawn lo hle tih a hriat a. Chumi piah lamah, abikin education department-ah, zirlai naupang ten an tuar zual dawn tihna a ni. Zirtirtu atan zirtir dan training chhuak ngat lak tur tih a nih laiin, training miah lo ten naupang an zirtir dawn tihna a ni a. |hahnemngaihna kawngah pawh a ngheta sawrkar hnathawk ve lo, aiawha kalte chu an danglam deuh ngeiin a rinawm.
Aikal lakna dan a awm lo tih a ni a, hemi chungchangah hian, aikal lak phalsaktu/hriatpuitu concerned officer-te leh aikal latute hi, a tu zawk nge dan bawhchhe nasa zawk? tih zawhna a piang thei awm e. Eng pawh ni se, tuna aikal lak tihtawp a ni ta rih hi, Mizoram tan chuan hmasawnna rahbi thar, hmasawnna mellung pawimawh leh chhinchhiahtlak tak chu a ni phawt mai.