CHANDRAYAAN-3 a tho leh thei dawn em?

Thla leilung chhim tawp lam Southern Pole-a Shivshakti Point-ah Vikram lander leh Pragyan rover te chuan ruahman anga lunar day chhunga an tihturte hlawhtling taka an thawh zawh hnuah sleep mode-ah awmin lunar night (lei lam ni 14 chhung) an hmang zo a, September ni 22 atang khan lunar day an hmang tan leh mek a. Lunar night chhung khan thla leilung zan lam boruak vawh dan hi -150 degree celcius leh a aia hniam te a nih theih avangin khawvawtin hun rei tak a hmeh khawng hnuah an khawlte hi a nung chhuak zo leh ang em tih chu tuna nghah mek a ni. Tun dinhmunah chuan nimin thleng kha chuan an la harh chhuak lo a, beisei nei takin lei lam atangin ISRO scientist rual ten an thlir reng a ni.
Thla hian chhun leh zan a nei ve a, mahse a ni khat hi lei lam ni 14 nen a inhen a, chutiang bawkin a zan khat pawh lei lam ni 14 chhung nen a inhen bawk. Chumi awmzia chu, thla hi ni 28 chhungin vawikhat a vir chhuak tihna a ni. Khawlte hian ni êng dawng leh pawh ni se, battery-te hi a in charge that chhung a rei dawn a. A awmzia chu, fridge chhungah sa i dah a, vurin a hmet khawng vek a, vur a tuiril hnua sa i siam thei chauh ang deuh tur kha a ni.
ISRO scientist Tapan Mishra chuan temperature hi -200 degrees Celsius a nih chuan, hetiang temperature hnuaiah hi chuan electronic hmanruate a chhiat theihna chance a sang hle a ni, a ti.
Scientist-te chuan beiseina sang tak nen an thlir mek a, Pragyan rover hi lo tho leh thei ta lo pawh ni se, a tihtur chin bituk chu tha takin lunar day chhung khan a thawk zo hman tho a. A muhil hlen ta a nih pawhin, rinawm takin India ram palai (ambassador) angin thla leilung a luahlum reng tawh mai dawn a ni.
Chandrayaan-3 hian thla leilungah Sulfur leh Oxygen a awm tih a hmuchhuak tawh a, tunah hian rover a lo harh chhuak leh thei a nih chuan a hmabak chu Hydrogen awm leh awm loh hriat tum a ni. Heng bakah hian thla leilungah mineral hrang hrang iron, calcium, titanium, alumina, silicon etc. a awm tih a finfiah tawh bawk a ni.
Vikram lander leh Pragyan rover te hian thla leilung an thlen hnu khan an tihtur an ti nghal char char a. Pragyan Rover hian lunar day chhung khan Vikram Lander (Pragyan rover phurtu) atanga metre 105-a hla a thleng a, a kal chak zawng hi second khatah cm khat a ni.
India hi thlaa inkap kai thei ram pathum US, Soviet Union leh China dawtah a palina a ni a, tuna a tumna thla leilung chhim lamah hian a tum thei hmasa ber a ni zui nghal bawk.