Chapchar Kut leh thupui

Mizo Kût zinga ngaihhlut hlawh ber Chapchar Kût chu nimin March ni 1 khan hman a ni a, thupuiah ‘Zo Nun Ze Mawi – Tlawmngaihna’ tih hman a ni.
Kum 2018 leh a hma lamah kha chuan Chapchar Kut hian thupui a nei thin lo niin a lang. Kum 2019 atang khan thupui neia Kut hi hman tan a ni a; thupui atan “Zofate inpumkhatna” tih hman a ni.
A kum leh 2020 khan “Zo nun ze mawi chawisan” tih thupui hman a ni a. Heta tang hian Chapchar Kut apiangin ‘Zo nun ze mawi’ series hi chhunzawm niin 2021-ah “Zo nun ze mawi -Thuawihna” tih hman a ni a. Kum 2022-ah Zo nun ze mawi -Rinawmna” tih hman a ni leh a. 2023-ah erawh kum 2019-a thupui lo hman tawh “Zofate inpumkhatna” tih kha hman nawn a ni a. Kuminah hian ‘zo nun ze mawi’ series-ah lut lehin, “Zo nun ze mawi – Tlawmngaihna” tih hman a ni a.
Tunhmaa kan pi leh puten Kût an lo hman thin dan leh tun hnua Kût kan hman thin dan hi chu a inang diak diak thei tawh lo tih chu kan hre vek a. Tuna Kut kan hman thin dan hi thangthar ten an rawn chhunzawm zel dawn a, chu chu Mizoten Chapchar Kut kan hman dan a ni chho zel tawh mai dawn a ni ber a. Chutih laiin, kan hnam tih dan pawlh dal zawnga kal lova, kan pi leh puten Kut an lo hman thin dan hlimthla erawh thangthar zel ten an chhawm nun reng theih nan kan humhalh hram hram hi kan tihtur pawimawh tak niin a lang.
Hetih rual hian, Chapchar Kut hian thupui hi a nei ta zel a, khuallian leh chanvo nei mi pawimawhten an thusawiah thupui mil tur thu an zep hram hram a, chu chu a thupuiin hun leh hmun a luah chu ni deuh maiin a lang.
Thupui neia Kût hman hi kan tihdan phung tur a nih tawh chuan, a thupui mil tur drama emaw, thuchham emaw a remchang dang pawh, programme-ah telhin mipuiin an hlawkpui theih dan tura ruahman theih ni se. Tunlaiah social media a tha tawh a, a thupui tur mila short video, painting, poetry, hla inphuahsiak etc. pawh Chapchar Kut ni taka tlangzarh tura huaihawt thin ni bawk se, chu chu Chapchar Kut thupui kan hlawkpui theih dan tur a nih a rinawm. Chapchar Kut thupui lian taka ziah kuau ringawt hi chuan a thawk nep deuhvin a rinawm.