Zorema Khawbung
-- Advertisement --
Genesis bung 1-ah chuan Pathianin, “Kan anpuiin mihring i siam ang u” a ti a; he sentence-ah ringawt pawh hian min siam ropuiziate, chungnung ziate a sawi chiang hle awm e. A chang chhunzawm zelnaah pawh khan min siamchhan chu sawi ngai lovin a chiang mai awm e.
Scientists te chuan kan thluak hi 30% bak a hmang tam berte paw’n an hmang lo an ti a (10% bak hmang ngailo tih kha, zirna thar berin 10% aiin kan hmang hnem tih an proved a, mahse a zat chiah define a hi an la chiang chuang lo mahse 30% vel bawr a ni awm e). Mihring thluak hi a nawlpuiin mipa 1.4kg, hmeichhia 1.2kg ni mah se, 20th century a scientist ropui bera ngaih Albert Einstein kha 1.22kg chiah zuk nia.
Pathian hian mimal tin hi a bik tak leh special takin min siam bik theuh kan ni a. Billy Grahama’n, “Pathian hian mimal tin hi min hmangaih bik theuh (individually love) a ni,”a tih ang khan.
Mimal tin hian talent leh potential bik hi kan nei theuh a, mihrang theuh kan nih angin kan talent hrang theuh, khawvel ber ni tura Pathianin a bik taka siam theuh kan ni a. Hlawlhtlinna, ropuinate, hausaknate hi kan hmaah hian a awm a, chu chu a tum apiangte, a tel rei peih apiangte, a haichhuak thiam thiam leh a ngaihna hria apiangin an haichhuak zel ani mai.Chuvangin talent tipung thiam leh peih apiang an hlawhtling zel a nih hi. Hetah hian tamtak chuan kan pianna hmunin a zir lo emaw chhuanlam hrang hrang kan nei mai thei, mahse chu’ng chu tum tak tak tan chuan chhuanlam a tling lo, mi tam takin an lo paltlang tawh.
Entirna hnai vai deuh han sawi ila, UFC Heavyweight champion, undisputed a retired a, hmanni lawka Boxing Heavyweight champion Tyson Fury rawn tumtu Francis Ngannou-a, Cameroon atanga Europe zin kawngte kha. A chhungte ngei paw’n ‘a inngaihtuah chian hunah a lo haw leh mai ang’ an tih hial khawpin a bei nasa a nih kha. Mahse thufing in, “Min tihlum lotu chuan min ti chak” a tih angin khang a paltlang zawng zawngte kha, amah tichheltuah leh khawvela bera siamtu an ni ta zawk a nih kha.
Sawi tawh ang leh Pathian thu atanga kan hmuh angin ropui taka duan theuh kan ni a. Pathian anpui, a hnuai hreta siam, Vantirhkkohte chunga siam leh kan rawngbawl tura siam an ni a (Lucifer a helna/thikna pawh kha thil awm tak tho a nih hmel). Chuvangin, “Kei chu engmah ka ti thei lo, bultanna tur ka nei lo, ka upa tawh” tiin chhuanlam hrang hrang nen kan inngaihtuah fo chuan chhuanlam chu a awm reng dawn.
Mahse heng zawng zawng hi bumna mai a ni tih hria la, i talent, thiam zawng leh tuina zawng i neih kha ngaihtuahin zawng chhuak la, chu chu taima takin bei la, vawikhatnaah chuan i hlawhtling nghal rup rup lo maithei. Mahse i tuma i chian a, i beih tauh tauh a, i teirei peih na na na chuan hlawhtlinna chuan a rawn um zawk ang che.
Rilru hi a pawimawh ber a, “Eng mah ka ti ve thei lo i tih tlat chuan ti chhin buai lo mai rawh, i hlawhchham sa”. Chutiangin ka tithei, ka la ni ve ngei ngei ang ti tlatte chuan hlawhtlinnna tam tak an nei thin. I huaisenna leh dawihzepna ah chiah a innghat.
Mizoram, kan state economy pachhiatzia chu sawi ngai lovin kan hre theuh awm e. Heti chung pawh hian kum 15 vel liam ta atang khan Entrepreneur hrang hrang an rawn chhuak teuh tawh a nih hi. Tun laia langsar zual Designer, ei siam lam, furniture lam etc chi hrang hrang an rawn chhuak teuh tawh a. Network marketing lamah pawh millionaire thlengin kan nei ve tawh a, kan nei zel bawk ang.Tunhma lehkhathiam chiah hlawhtlinna tura ngaih thinna rilru pawh kha, a ziaawm chho zel tawh. |awng mawi lo ni lo se, kum 2/3 vel liam ta a, emgahmah kan ngaih lohte khan tam tak chu min khum tawh a nih hi. Sawrkar hna nge nge chu a la stable a, lehkhathiam tan chuan tun thlengin a la tha viau tho.
Tunah chuan internet kaltlangin khawvel kan hmaah a inchhawp a,kan tuizawng, thiamzawng hrang hrang eizawnna ni tlakin kan inzir thei vek tawh.Sports-ah te, photography-ahte, zai leh lam lamah te, thlai leh pangpar lamah leh fiamthu etc thlengin eizawnna mai ni lovin hausakpui tham em em chu ni lo mah se, sawrkarna hnathawk aia la lut tam fe fe hi kan ramah ngei pawh an awm ve nual tawh.
Pathian anpuia siam, min veng tura Vantirhkohho a dahte hian kan ropuizia leh kan chungnungzia a ti lang chiang hle a. Kan sawi tak angin eng pawh mai hi kan tum na n ana chuan kan background pawh lo chhe viau mah se eng pawh kan ni thei. Khawvela exam har ber pawl All India Service, Charter Account, Dr Superspecialist thlengin kan nei tawh a. PhD te phei chu kan nei ve nual tawh a. An interview, ka en ho tawh kha chuan ni tin darkar 12 to 16 te an inzir hlawm a nih kha. Hlawhtlin kha an phu lutuk a, hlawhchham se a awihawm lo zawk ang.
Khawvela mi hausa ber pawh ni tawh, Andrew Carnegie lehkha pawh zir mumal thei lo khawpa rethei, retheih lutuk avangin kum 9 vel atangin hna a thawk tan a. A hnaah a rinawmin a rintlak em avangin, a hnaa a pu chuan a thachhang dawltuah a hmang chho ta hial a. Harsatna chi hrang hrang rapthlak tak tak tawkin, a pu phei chuan an thil tawn rapthlak em avangin lung tha lovin a boralsan thuai nghe nghe a. America siam ropui ber bertu milian (Titan), American glided age an tih era lo chhuahna Cornelius Vanderbilt (New York monument, Grand Central) neitupa thin te, John D Rockefeller (Standard OIL) neitupa zing ami a ni a. Henry Ford, (Ford) car company neitupa te harsatna leh hlawhchhamna tam tak paltlanga, ban zai rel duh loh vanga khawvela an hming dai tawh lo turte an ni.
Jeff Bezos-an 1994-a Amazon a din dawn khan, a thianpa hnenah invest ve turin a sawm a, a thianpa hnenah chuan, “Company ka din tur hi $100billion company a la ni ang” a ti a. A thianpa nuih chu a za lutuk, a awm tho. A hun lai khan khatiang zat kha pawisa a la awm ngai lo ti mai ang. Ram tam tak pawn an la nei lo. 1994 kuma hausa ber pawn $21b vel chiah a la nei a. Mahse a tum a, a awih bawk a $100b nei mai ni lovin a letin a khum a, a thleng dik ta ngei mai a ni.
Steve Jobs-a kha, ama Company din atang ngeiin an ban a nih kha. A nat dan turzia chu, tlakchhiatna pawh vawi tam tak a tawk mah se, a beidawng duh lo va. A boral hma deuhva a thusawi ropui tak chu, “Hringnun hian brick-in vawm thlu tawp tawp che mah se, tho leh zel rawh, tho leh la bul tan tha rawh” a ti a. Beidawng duh lova a thawh hramna leh a business strategy rah liau liau vangin Apple company tlachhe leh chu chhanchhuakin tunah khawvel Company lian ber a ni ta hial a ni.
Heng mi tlemte chanchin entirnan kan ziah pawh hian kan tum phawt chuan mihring/mimal tin hian thil kan tih theihzia, kan ram kan thlak danglam theihzia a lang chiang viau a. Lehkha i thiam lo, bultanna sum i nei lo, mahse Pathian hian mimal tin hi mi bik, khawvela a ber ni thei turin, “Mak tak leh hlauhawm taka duan” tih angin. Hlauhna, zamna, huphurhna, indahhniamna, thei ve lo nia kan inhriatna zawng zawng hi sual bumna leh kan hmelma lian ber a ni tih hria la. I thiam zawng, i tui zawngah khan hma han la tawp la, a tirah chuan i hlawhtling nghal kher lo maithei, mahse ti lui hram hram la, teirei peih bawk la. Hlawhchhamna hian finna tamtak a keng tel a, chonaah la bawk la. Tichuan finna tam tak leh awlsam zawka tihdan i hre chhoin i hmu fuh telh telh ang a. Hlawhtlinnate, ropuinate leh hausaknate chuan a rawn zui mai ang che. I thil theihzia i inhre tawh ang.
Thiltih theih loh a awm lohzia leh thil i tih theihzia chu, saptawng chuan “IMPOSSIBLE” tih hi ‘thil tih theih loh’ tihna a ni a. Mahse a thumal vek hian “I m Possible” a lo inti a, chu chu ‘thil tih theih loh hi ka ti thei a ni’ tihna emaw a tlukpui chu a ni a. Sports brand lar pahnih Adidas Slogan leh Nike chu “Impossible is nothing” tih leh “Just Do it” tih hi la kawp chhin ta ila, “just do it cause everything is possible “ tih emaw a ni ang. “Ti tawp rawh, tih theih loh a awm lo.”
Chuvangin, engkim ka ti thei, hlauhna, hniam bik riauva inhriatnate, zamna, huphurhna te hi bumna mai mai leh ka hmelma lian ber a ni tiin infuih fo ang che.