Chapchar Kût thupui

Chapchar Kût 2025 hman dan tur relin tunhnai khan Chapchar Kût Organising Committee chu chief minister hovin an thukhawm a, Chapchar Kût atana inbuatsaihna an thlirho a; Chapchar Kût 2025 thupui atan Zo nun zemawi – Hawihhawmna tih thlan a ni.
Kan pi leh pute khan Chapchar Kût hi thupui neia an lo hman thin awm hi hriat a ni lo a. Tun hnuah pawh hian, kum 2019 atanga hman tan chauh kha ni maiin a lang.
Hriat theih chinah, 2019 khan Chapchar Kut thupui atan ‘Zofate inpumkhatna’ tih hman a ni a. 2020-ah Zonun Zemawi Chawisan; 2021-ah (virtual Kût) Zonun Zemawi: Thuawihna; 2022-ah Zonun Zemawi – Rinawmna; 2023-ah Zofate Inpumkhatna; 2024-ah Zonun Zemawi Tlawmngaihna tih hman a ni a. Nakkum 2025-ah chuan Zonun Zemawi – Hawihhawmna tih a ni.
2019 leh 2023-ah Chapchar Kût thupui atan ‘Zofate Inpumkhatna’ tih hman a ni a; thupui hman nawn awm chhun a ni. A bak chu Zonun Zemawi series-in a kal a, chungte chu- Thuawihna, Rinawmna, Tlawmngaihna, Hawihhawmna tihte a ni.
Heng – thuawihna te, rinawmna te, tlawmngaihna te leh hawihhawmnate hi Zonun Zemawi kan tihte a nih chuan, tun dinhmunah hian Zonun Zemawite hi a mawi zo ta lo a, i chawinung thar leh ang u kan ti nge; heng Zonun Zemawite hi a la mawi chhunzawm reng a, i chawi vul zui zel ang u, kan ti?
Zofate hi ram hrang hrangah kan awm darh a, unau kan nihnate pawh hi kan theihnghilh mai pawh ni lovin, a hriatin kan hre tawh mang lo a, chuvangin inpumkhatna lam hi kan inhrilh thar leh a ngai. Pi leh pute atanga hnam nun zemawi tak tak kan chhawm nun chhoh zel kha tunah chuan kan hloh nasa ta lutuk a, kan chawi nun thar leh a ngai, chungte chu thuawihna, rinawmna, tlawmngaihna, hawihhawmna.
Thu hi kan awih lo a, dan kan bawhchhe reng mai a ni. Kan rinawm lo lutuk a, eirukna hi a hluar a ni. Tlawmngaihna a kiam ta hi a tlawmngaihthlak. Hawihhawmna hi kan tlachham ta lutuk a, aia upa zah nachang pawh kan hre ta lo.
Heng zawng zawng hi Chapchar Kût kaltlanga inhrilh thar leh kan duhte chu a ni. Kût hi chu Kût a nihna angin hmang mai ila, kan fawmkem hnem thin ta lutuk a, kan Kût te hi a hlimawmna bo thak khawp hian nakinah chuan awareness campaign beihpui thlakna atan ber te hian kan la hmang mai ang tih pawh a hlauhawm hlel lo e!