Chapchar Kut

Pi leh pute atang tawha Kut zinga ngaihhlut hlawh ber Chapchar Kut chu tun thleng pawhin Mizo Kut zingah ngaihhlut hlawh ber a la ni chho ta zel tih a lang.
Pi leh pute khan lo vah zawh, lo la hal hma si, ‘Chapchar awllen’ an tih mai, March thla bul lamah Chapchar Kut hi an hmang thin a; ni li vel an hmang tlangpui a ni awm e. Chapchar Kut hi chai leh lamin an chen a, chumiin a ken tel chu zu leh sa a ni.
Tun hnuah hi chuan, sakhaw thil avang leh nunphung leh eizawnna a lo danglam tak em avangin, pi leh puten Chapchar Kut an lo hman thin dan anga hman zui zel a rem tawh lo. Chuvangin, kan tun hun nunphung mila Kut te pawh hi hman a lo tul ta zawk a ni. Tunah phei chuan, ‘tourism promote-nan’ te kan ti ta zawk a, intihhlim paha sum lakluh dan kan zawng bawk a, engtin emawa eizawnna kawnga hlawkpui tumin Chapchar Kut hi kan tinzawn a ni ta ber awm e.
Hetih lai hian, Chapchar Kut awmzia leh nihna hi thangthar chhuan lo awm zel tur ten an bosal loh nan, pi leh pu ten Chapchar kut an lo hman thin dan hlimthla hi Chapchar Kut kan hman apiang hian drama hmanga entir theih ni thin se, chu chu hnam tih dan phung (culture) vawnhimna tangkai tak a nih a rinawm.
Tuna Chapchar Kut kan hman dan programme hi a tha tlangpui a, kan tih dan hi hnam tih dan a ni chho zel tawh mai dawn a; chutih rual erawh chuan, thil chi hrang hrang, tha kan tih zawng zawng vawm khawm nan kan hmang lutuk ang tih erawh a hlauhawm. Tun hnuah hian thupui neiin Chapchar Kut hi kan hmang chho ta zel a, hei hi a tha tho e, mahse thupui neia kan kal rau rau a nih chuan, thupui phawk chhuak zo tur, entir nan tun tuma thupui ‘Zo nun zemawi: Inremna’ tih mila thalaite hmuhnawm tihtur zawnga drama hmanga entir te ni thei se, khuallian emaw, tu te emawin thusawinaa an zep tel zeuh ringawt ai chuan a sawt zawkin a rinawm.
A hun thu-ah pawh hian, kan piputen lo hal hmaa Chap a char hun nghah paha an lo hman hun March thla bul lamah let leh thei ila chuan, ruahsur avanga buaina te hi kan pumpelh thei mahna.