CHAPO LOVA NUN BRANDED

David Zochhuanmawia
(Vida Hrahsel Saza)

Hla siamtu chuan, “Hahchawlhna an zawng, chawlhna rêng an hmu lo; Nun hlimna an zawng, hlimna rêng an hmu lo. Hê kan chênna khawvel hianin rah tha rêng a chhuah lo,” a lo ti a. A dik âwm ngawt mai. Mahse, rah tha chu chhuah lo se zo tui thianghlim in tùr leh boruak thianghlim dawn tur a awm lo ang. Mihringte erawh vaivuta siam vaivuta kir leh mai tûr kan ni a, siam chawp kan ni miau a lawm le!
Ka thalaipui tam zawk hian kan thuam inbel chungchangah Branded lo chu kan ti theuhin a rinawm a, tu pawh ni se ka mawh lo e, a tha leh tlo tur a nih phawt a hnu. Neih phak loh awh hi sual a ni lo a, neih phak loh neih tuma rim taka hnathawh pawh sual a ni hek lo. Intlansiakna khawvel alawm maw le. Awhna sual nei khawpa rilru dik lo put erawh thil tha lo tak a ni thung a. Thawmhnaw kan duh branded ang hian kan nun hi chapo si lovin branded ve thung se. Tin, kan sum dehchhuah rêng rêng hi dikna leh rinawmna hmanga lak luh (income) ni bawk se.
Eng anga Branded pawh ni se siam chawp a ni tih kan hre vek a. Branded ni tûra siam chawp vek, 2nd Copy an tih pawh siam chawp vek. Pathianin khawvel a din dân ngaihtuahin siam chawp veka engkim awm a nihzia a lang chiang a. Kristian inzirtirnaah chuan, “Pathianin lo awm rawh a tih hmanga engkim lo awm,” a ni a. Mihring pawh hi vaivut hmanga siam leh a din; Nunna thaw a pêk hmanga nunna nei mai chauh kan ni a. Khawvela thil siamchawp zawng zawngah chuan nunna thaw min pêk hmanga siam kan nih avangin kan branded ber thung a ni.
Kohhran rawngbawl satliah ni lo, Pathian rawngbawltu lâr pakhatin a sawi ka hriat reng chu, “Khawvela i nihna hmangin Vanram i kâi dawn lova; Khawvela i thil tih that hmang pawhin i kâi dawn hek lo. Mahse, Pathian duh zâwng i tih thin avang chauhin Vanram hi i ta a ni,” a ti a. Bible-ah a zàwlpui a awm ngêi ka ring a, ka pawm zâwng tak a ni a. Kan nun branded avangin Vanram hi kan ta tûr a lo ni ngawt lova, Pathian duhzâwng kan tih a ngai zawk a ni.
Khawvel kan dam chhûnga hrehawm rêng rênga nun hman ai chuan tia mahni NUNNA la hialte pawh an awm. Khawvel hi huai takin, hrehawm taka ral tûr pawha kan hmachhawn hi a tul a. La thi vek tûr tho kan ni tih inhre reng chungin a hun hmaa mahni nunna lâk hi chu tum lo ang u. Khawvela kan dam chhungin ro (Rochan âi) kan mamawh a, thihsan hnuah eng a ni leh lawi si lo. Kan dam chhûnga kan himna leh invenna tûra In leh Lô chênna tûr kan la neih ve tek tek chhung hi chuan hausak lutuk hi tum lo mai ang u, Chapo a hlauhawm êm mai.