Chaw eikhamah lawngpar ei thin rawh

Ka tihrimtui nana spice kan hmanlar tak, mi tam takin mouth freshener anga kan hman lar mai bakah kuhva nena han sehhmeh velah pawh kan hman uar tak lawngpar (clove) hian mouth freshener mai piah lamah thatna a ngah khawp mai.
Eng emaw thil rimna deuh kan ei changin a rim tihreh nan lawngpar chu kan ei thin a, a rim a nat bakah a taste ti hleithei lo pawh awm theih a ni a, hetiang tan chuan a hel a ei lovin a tui in mai tur a ni. Lawngpar chu thingpuife anga hmangin, chaw ei kham thingpui atan lawngpar tui in la, i hriat loh laiin i taksa tan thil tha tak i ti tihna a ni ang. Tun tumah hian Times of India-in chaw eikhama lawngpar ei emaw a tui in emaw thatna ni an sawi te kan rawn tarlang e.
Lawngpar hi spice kan hman lar tak a ni a, active compound, Eugenol a pai tam avangin nachhawk theihna te pawh a nei a, hei vang hian ayurvedic medication-ah pawh hmun pawimawh tak a chang a ni.
Chaw eikhama lawngpar ei emaw a tui in emaw thatna pakhat chu kawpuar a tiziaawm thei. Lawngpara compound awm, eugenol hian kan chaw paitawihna kawng (digestive tract) a tihahdamin, gas insiam tur a titlem thei. Chaw eikhama lawngpar pum hnih khat han hmawm zauh emaw, a tui lum pep pep no khat emaw vel thingpui aia in hian kua a dam a, acidity a tiziaawm thei bawk. Duh aiin zanin chu ka ei tam deuh tlat mai, kan tih tumah phei chuan lawngpar hi ei a tha lehzual ang.
Zunthlum nei emaw, zunthlum lam hnaih ve tawh (prediabetic) emaw tan pawh lawngpar hi chaw eikham hmawm sawm atana thil tha tak a ni. Lawngpar hian insulin sensitivity a siamtha thei a, chuvangin chaw einaa kan chawhmeh leh thil ei avanga chaw eikham thisena glucose level rawn sang thut tur ven nan lawngpar hi a tha viau a ni. Lawngpar hian kan thil ei a starch te kan pum chhunga glucose-a a insiam tur a timuang thei a, chu chuan blood sugar sang thut tur kha a tiziaawm thei a ni.
Chaw eikhama pum nuam lo nei thin tan lawngpar hi a tha khawp mai, Ayurveda leh herbal damdawi-ah pawh digestion lama harsatna neite enkawl nan an hmang lar khawp mai. Chaw eikhama lawngpar kan ei hian digestive enzymes insiam tur a pui a, chu chuan kan thil ei te paitawih a tinuam a, kawpuar leh pum puar nuam lo te a tiziaawm thei. Hetihrual hian kan thil ei atanga thil tha kan taksa tana lo lak zung zung theihna a tichak bawk.
Lawngpar-ah hian natural antioxidant a tam a, chuvangin kan taksa a free radical insiam tur ven kawngah a thawk hlawk a, taksa a vûng insiam tur a tiziaawm thei bawk. Natural antibacterial leh antiviral property a neih avangin tlang hrileng lakah pawh thui takin min veng thei bawk a ni.