Chaw min petute kan thlawp a ngai – Dr K Beichhua

Chaw min petute kan thlawp a ngai
– Dr K Beichhua
Kan ram kan hnam kan hmangaih a nih chuan chaw min petute kan thawhpui a, kan thlawp ve a ngai tawh tih BJP hruaitu Dr K Beichhua chuan a sawi.
State BJP office-a hun an hmanaah BJP Mizoram president Dr K Beichhua chuan, India-in ram hrang hrang thawhpuiin thianthaah a siam a, ram tam takin India thiantha nih an duh mek a. Chutiang dinhmun kan nih lai chuan Mizoram hian engvangin nge Prime minister Modi kan thawh pui theih loh, tiin a zawt. “Ram tam tak, Kristian ramten thawhpui loh an hlau mek a, chuvangin Mizoram mipui kan inenfiah a ngai,” a ti.
Thalai, nu leh pavalai tam takin kan ram hmalam hun kan ngaihtuah a ngai hle tih a sawi a. PM Modi kan do hian awmzia a nei loa, kan do nat poh leh a dotute kan te rawng rawng mai dawn tih a sawi. “A chhan chu, thawhchhuah mumal nei lo, chawm hlawm ang mai kan la nih vang a ni. Kan ram kan hnam kan hmangaih chuan chaw min petute hi kan thawhpui a, kan thlawp ve a ngai tawh dawn lo’m ni? Chawbel bula kan tamchhawl lohna turin Mizo mipui hi kan fan theih a ngai ta hle a, kan inpawhfân thiam loh chuan kan hmabak a thim hle dawn a ni,” a ti.
Party dangten Dampa bial hmasawnna tur hrang hrang mipui hnenah sawiin puang mah se, chu’ng mite thusawi chu belhchian dawl lo leh dawt mai a ni tih BJP Mizoram hruaitu hian a sawi a. Kum 22 vel sawrkar Congress party leh kum 15 vel sawrkar tawh MNF party hian Dampa bial an hmangaih loh zia a langchiang tih a sawi.
ZPM tan pawh Dampa bial hmasawnna tur an tiam a nih chuan, neih sa an nei loa, central atanga dil tur leh project kaltlanga pek tur a nih avangin a pe theitu tak tak BJP candidate an vote mai hian, Dampa to Delhi, Delhi to Dampa, Development for Dampa chu a taka a lo thlen theih dawn zawk avangin, Dampa bial hmasawnna leh thanna atan, Dampa bial chhung inkalpawhna kawng tha kan neih theihna atan BJP official candidate vote turin a ngen tih a sawi bawk.