Chawchhun sem thua harsatna a fel tep tih department-in sawi

Chawchhun sem thua harsatna
a fel tep tih department-in sawi
Sawrkar school-a chawchhun buaipuitute harsatna chu chinfel a ni tep tawh a, central lam nena kalkawp a nih avangin theih ang tawka bawhzui zel a ni tih School Education department chuan an sawi.
PM POSHAN state nodal officer, School Education director chuan thuchhuah siamin, Mizorama primary school leh middle school-a chawchhun sem thin chu hun rei fe tluang taka kalpui a nih reng laiin, tunhnaiah fund chungchangah department-in harsatna a tawh avangin duh angin sum pek chhuah zung zung tur a awm loa, school lama thawhpuiten he harsatna avanga chawchhun an sem thin 2024 October 18 atanga an chhunzawm theih tawh loh tur thu an thlen chu an dinhmun an hriatthiampui hle tih a sawi.
An harsatna ber, chawhmeh man (material cost) chu kumin January atanga tun thlenga pek chhuah a nih loh vang a ni ber, tiin, cook -cum- helper hlawh thla 4 pek a ni tawh loa; sawrkar tharin cook- cum- helper dinhmun hria in, thlakhata Rs. 1500 an hlawh thin chu Rs. 3000 a tisangin, hlawh thar ang hian April leh May pek a ni tawh tih a sawi bawk.
‘Harsatna a thlen chhan ber hi, fund pek dan system thar – PFMS (Public Financial Management System) hman a ni a, chumi hnuaiah chuan state link scheme awm lehin account pathum hawn a ni a; chu chu a hran theuhin Finance department, PFMS leh State Treasury leh central lama PFMS nen inthlunzawm vek a ngai a, hemi buaipui chhung hi hun a heh em vang a ni,’ a ti.
PFMS chu thil thar a la nih avangin state PFMS-a thawktute nen inberawnin inhai kuak chawp zel a ngai a, heng zawng zawng zawh a nih hnuah central assistance dilna hi thehluh theih a ni chauh a, kum 2023-24 atana 1st installment chu October thla laihawl vela hmuh theih chauh a ni tih a sawi.
PFMS chu langtlang taka kalpui a nih avangin fund kal dan hi central lamin an rawn hmu vek a, fund neih zawng zawng atanga zaa 75 tal hman zawh loh chuan instalment dang dil theih a ni lo tih School Education director hian sawiin, central-in fund a pekchhuah veleh theihtawpa umzui a ni chung pawhin, duh angin hma lak chak a har a, hetianga thil tih zung zung theih loh a nih dan hi school-a an thawhpui zirtirtute leh mipuiin an hriatthiampui a tul hle tih a sawi a ni.
‘Mizoram sawrkarin naupang chawchhun a ngaihpawimawh avangin state share pawh advance-in nuai 484.29 chu October 18 khan a sanction tawh a. Central-ah lamkal intirin department-in hma a la a, reiloteah chinfel thuai beisei a ni. Thawktuten naupangte dinhmun hrerenga mahni zawn theuha tlawmngaih chhuaha a theih anga hma la chhunzawm zel turin kan inngen a ni,’ a ti.