Chawhmeh zuarte leh Inrinni…

Aizawl khawpui enkawltu AMC hnuaia Municipal Commissioner chuan Section 208 of Mizoram Municipalities Act, 2007 hmangin, Mizoram Legislative Assembly leh a chheh vel – Venghlui Local Council leh Tuikual South Local Council huam chhung kawngkam chu inzawrh phal lohna hmunah a puang a. Thupek bawhchhiate chu Mizoram Municipalities Act, 2007 hmanga Rs. 5,000/- chawitir theih an ni a, an thilzawrh pawh mansak theih a ni bawk.
Assembly House bul bazar kang leh a hnu lama thil thlen dan chu mipui lam pawhin kan hriat vek kha. Tuna harsatna a lo awm leh tak chhan hi, AMC Multi-Complex luah lum lova Inrinnia thlai zuarte kawngkama an inzawrh chhuah leh tak vang a ni ber.
Thlai zuarte hi an thiamawm tiin han sawi phawt ila. A chhan chu, tunhmaa kawngkama an inzawrh lai kha chuan awlsam takin kawngpuia veivak ten an dawr thei a, dawrtu an tam thei. Tuna AMC Multi-Complex hi chu pan turin a hranpaa tlan kual te a lo ngai a, lirthei dahna a lo tha tawk lo bawk nen, customer-ten hmun dang kawng kama inzuar thote an pan phah a, chuvangin an inhralh thei lo a, an mangang ve a ni. An inhralh theih loh miau chuan, kawng kam bawk an pan a lo ngai leh ta a ni ber.
Inrinni bikah hi chuan Aizawl khawpui kawng dung tluan mai hi thlai zawrhna hmunah a chang a, hei vang hian mipui pawh hian Veng hrang hranga bazar hmun bik pan peih lovin a awlsam zawk avangin kawngpui dunga bazar hi an intihhmuh tawh a, chu chu thlai zuarte pawhin an lo bawh ve zel lo thei lova, kan heti zo ta hi a ni ber awm e.
Thuneituten dan tlawhchhanin bazar building chhungah thlai zuarte khalh luh an tum a ni a, dan bawhchhiate pawh man tawk chu an nei ngeiin a rinawm a. Tuna inzawrh phal lohnaa puan hnan tak Venghlui Local Council leh Tuikual South Local Council area-a inzuar tam takte hi chu, Inrinni chauha thingtlang khua atanga khawpui rawn pan ve tawk tawk an ni a, inzawrh phalna hmun dangah remchang zawnsak ni thei ta zawk se a duhawm hle a ni. Kan hmuh leh kan hriat angin Aizawl khawpui veng dang kawngpui dung zawng zawng deuhthaw mai hi Inrinni bazar hmunpui a ni deuh vek tawh a. Tuna khapna hmun lo changtaa thu thin thingtlang khua atanga lokalte hi chu, heng hmun dangah te hian an thut vena tur ruahmansak ni ta zawk se, kan hahdam tlang mai lo maw le? Cheng sanghnih/khat man thil zuarte hi cheng sangnga kan chawitir mai chuan, a sawhkhawk hi kan zo leh si lo palh ang e.