Chawhmeh zuartuten an thutna ngaia thuttir leh turin AMC ngen

Chawhmeh zuartuten an thutna
ngaia thuttir leh turin AMC ngen
Tennis Court chhehvel leh Horticulture directorate pheia chawhmeh zuar thu thinte chuan midang nawrna avanga nawrchhuah an ni tih sawiin, Aizawl Municipal Corporation chu an thutna ngaia thut tir leh turin an ngen.
Tennis Court Chawhmeh Zuar Welfare (TCCZW) hruaituten thuthar thehdarhtute an hrilh danin, Treasury Bazar kanga thute nen an ni chu a hrang daih an ni a, an ni chu a tam zawk Aizawl pawnlam niin, Inrinni bik chauh an thu thin. Bazar a kan khan, he hmuna thute chu AMC hian AMC Multi Complex-ah a thut tir a, chawhmeh zuar dang an nawrchhuah chuan thut an intiam a, chumi ang chuan AMC-in an ni ho chu a nawrchhuak ta tih an sawi a ni.
Multi Complex ah hian hnawhluh tum an ni na a, thutna an inchan loa, step-ah leh lirthei karah nen lam an thut a ngaih thin bakah Inrinni tin an thutna sawn kual a ni a, an ‘regular customer’ tan zawn hmuh harsa khawpin sawnkual zin an ni a, tunah a chhawng 4-naah dah an ni leh mek tih an sawi bawk.
Hetiang hi an dinhmun a nih avangin an inhralh hleithei loa, Inrinni chauha thu an ni bawk nen, an thutna ngaia thut leh chu an duh ber niin, June 21 (Inrinni) thil phut neia kawng an dan avanga mipui harsatna an siam avangin ngaihdam an dil nghal tih an sawi a ni.
Kum 2000 hmalam atangin heng lai hmunah hian an thu tan a. AMC pian hnuah pawh The Street Vendors (Protection of Livelihood and Regulation of Street Vending) Act 2014 hmangin an dikna leh chanvo humhim theih a nih dan an hrilh zawk tih an sawi a. An chawhmeh zawrh chu a thianghlim tawk loh hlauin kum 2017 khan AMC hian dawhkan pe in, ID card an siamsak bawk a, thawhhona tha tak an nei thin tih an sawi a ni.