Reuben Lalnunthara Hnamte
-- Advertisement --
“Hosana! Lalpa hminga lokal chu fakin awm rawh se. Ram lo thleng tur, kan pa Davida ram chu chawimawiin awm rawh se.Chungnung berah khian Hosana!”( Marka 11:9-10) Lal Isua kha a damchhung hun kha rawng a bawl hma khan mi satliah leh mi pangngai ve mai nia mite hmuh a ni. Rawngbawla a chhuah hma chanchin Bible hian a tarlang lem lova, a tarlan awmchhun chu thingrem siamtu fapa a nihna leh a pa a pui thin tih kha a ni deuh mai. Kum 30 a lo tlin chuan a hna thawh tur leh he khawvela a lokal chhan hlen tur tirhchhuah a ni ta a. Rawng an bawl tan a, thu tha leh mak tak tak a han chhakchhuak a, thil mak an tih tan pawh khan lawm a hlawh lo va; mi te mak tih a hlawh a ni. Ama khua ngei Nazareth phei chuan an lawm lovin, an chawimawilo lehzual tih kan hmu a. Ama chhungte ngei pawhin an ring lova, an awih lo a ni. Ka rin dan tak phei chuan mi te khan an tawngel nasain a hnunglamah chil an chhakkhum hial thin ka ring. Nuihzat deuh pawhin an chhaih thin ngei bawk ang
. A nun kha a khawhar hle bawk ang a, rilru rum vawng vawng chang leh tah deuh zawih zawih chang pawh a neih ngei ka ring. Pathian fapa inchhal a, Abrahama awm hma pawha awm tawh ni a a han insawi phei kha chuan an deusawh dan tur leh, khawtlang pawhin mi pangngailo leh a deuh roh ang te pawhin an chhuah maithei a ni. Sunagog a thu a sawi hmasak ber tum phei kha chuan mipui khan thah hial an tum a nih kha. Chutiang khawpa hmuhsit leh endawng tuarin bula rawn tan a ni a. Pathian fapa a ni a, Pathianin a tanpui reng a lawm kan ti maithei; mahse, Pathian fapa a nihna kha a hun te ah lo chuan Pathian pawhin a lan tir lem lo. Mihring anga lopiang leh seilian a nihna kha lan tir a tum ber a ni. Chutih laiin puithiamte khan a rawngbawl dan danglam tak leh huaisen taka anmahni a sawisel thin chu an ngaithei hauh lo mai a. Amah man dan tur leh puhchhiat dan tur zawngin mite an fuihpawrh a, a chetchhiatna an chang ran bawk.
Isua rawngbawl chhung hun hrehawm dan tur kha ka ngaihtuah thin; tuman an lawm lo tih theih a ni a. Ama chhungte ngei pawhin an zahpui a, in lamah phei chuan an zilh fo ta ve ang. Khati khawpa lawm hlawh lo leh hmuhsit a nih pawh khan chhel takin a tuar a, Pa a hnaih tlat a, a tawngtai reng a, huaisen takin a tih tur chu a ti mai a ni. Keini mihirngte hi han in en chiang ta ila; lawm hlawh lova rawngbawl chu kan duh miah lo tluk a ni. Kan thusawite miin min fak deuh loh phei chuan kan hnual mai. Miin min sawisel deuh phei chuan kan khing uiah uiah reng mai a nih hi. Miin min lawma min chawimawi deuhna lovah phei chuan rawngbawl pawh hi kan duh vak mang lo. Rawngbawlnaah emaw, pawl hovah nise a dinhmun tha deuh kan chan loh phei chuan kan lungawi lova, kan hnual mai thin. Chawimawi hmasak hi kan duh a, min chawimawi lotu deuh phei chu kan hmu tuihnai lo nghal deuh mai thin.
Keini aia kan thiante mi ten an lawm deuh leh an chawimawi deuh phei chuan kan na nghal deuh mai. Isua chuan “Tupawhin ka rawng a bawl chuan ani chu Pain a chawimawi ang” (Johana.12:26)a ti a. Chawimawi hlawh tum ringawta rawngbawl erawh a tlo ngai lo.Hmuhsitna leh cheksawlna nena rawngbawlin, a tih tur a hlen dawn hnaiah Pathian chuan a chawimawi ta. Tu ma khap theih loh khawp a mipuite rilru chu danglamin Jerusalemah chuan mi zawng zawng chawimawiiin a awm ta a. Mite chuan an puan hialte a kalna tura phahin, lal ang hiala chawimawi a hlawh ta mai a ni. Lal a nihna chu a hun takah tihlanin a awm a, Hosana Lalpa hming lokal chu chawimawiin awm rawh se. Chungnungberah khian Hosana tiin mipui chu an aurual ta thup thup mai a ni. Juda mipuite khan Rome laka anmahni chhanchhuak tur niin an ngai a ni maithei a, duh nise chuan mipuite kha a hruai kawi vek thei ngei ang.
Mipuite khan eng rilru pawh lo pu in lo chawimawi pawh nisela, Pathianin a tum ber chu chawimawi kha a ni. Lal a nih zia leh, roreltu a nih zia kha tihlanin a awm a, Rome sipai ho leh puithiamte pawh khan tihngaihna hre lovin an thlir ringawt a ni ngei ang. Khang hun laia a u ring ring leh Lal a nih thu puangtute kha, krawsa khengbet tura a au ring ring pawh a ni leh maithei. A ropuina leh a nawmna thlahlel ringawta chawimawi a, a retheihna leh tuarna lo thlen huna phatsan leh thin kan ni em? Isua hi kan thinlung taka Lalah i puang ang u. Mangan hun chiaha Pathian au va, nawmsakna huna phatsan leh si nun hi I kalsan ngam ang. Engtik lai pawhin, tuarna leh hmuhsitna karah pawh, ringlotute hualvelna karah hian Isua hi kan nunah Lalber rawh se. Kan rawngbawlna leh ama hminga kan thiltihte mite’n hriatthiam loh chang awm mah se, a hun takah chuan Lalpan min chawimawi dawn a ni.
Isua Lalna nunah hi chuan midangte itsikna te, relchhiat duhna te a bova; mahni lam in dah tha a midangte tana malsawmna ni tura inpekna nun a ni. A Lalna chang pha silova ringtu nun neih hi a hlauhawm ber. Mahni lansarh duhna ah hi chuan Isua’n Lalna a chang thei ngai lo. Isua Lalber lohna chhungkua pawh a tirin vul viau thin mah se, a tawpah lungngaihna leh chhiatna a ni thin. Kan thiamna leh finna, hausakna te hian kan nunah Isua Lalna tur hi dal lo se la; Isua hi Lalber a ni, chungnungberah khian Hosana Lalpa hminga lokal chu chawimawiin awm rawh se” tiin kan ka mai nilovin I au chhuak ang u.