Chawl rei tur Haaland

Chawl rei tur Haaland
Manchester City goal thun khawl Erling Haaland chuan Pathianni FA Cup quarter-final match-a 2-1-a mualneitu Bournemouth an hne h tum khan a kheimit a tina a, second half minute 61-ah lakchhuah niin, Thawhtanni khan City manager Pep Guardiola chuan Norwegian international hliam endik atangin chawlhkar sarih lai a chawl tling thei dawn niin a sawi.
Haaland hian minute 49-ah Bournemouth laka City siphurh a sut a, hliamin a takbuak zui tak avangin a khel tluan thei lo a, April thla tawp lam semi-final match pakhat zawka Nottingham Forest an mikhual hunah khelmual a lut thei dawn em tih hriat theih a ni rih lo.
Thawhtannia Manchester City thuchhuah chuan an striker kheimit veilam na chu endikna hmasa kalpui tawh a nih thu leh a chawlh rei zawng chhutchhuak thei turin specialist an la rawn leh tur thu an tarlang.
Premier League club thuchhuah chuan, “Tun season-a khelh hmabak kan la neihah hian kirleh hman turin kan beisei chhin phawt a, a fit hman tura kan beisei zingah kumin nipui thawt laia khelh tur FIFA Club World Cup hi a tel,” tiin kumin June ni 14 atanga July ni 13 chhunga United States lama khelh tur tournament lianah chhawr hman an inbeisei tih an puang.
Haaland hian tun season kal laia league game vawi 28 a khelh tawh atangin goal 21 a thun tling tawh a, inelna hrang hrang belhkhawma a goal thun tawh zat chu 30 niin, assist vawili a nei tling tawh bawk.
Four-times defending champion City erawh tun season-ah hian beisei angin an chetha tawk lo a, Premier League table-ah pangana daih niin, league match an khelh hnuhnung vawiliah vawikhat chiah an chak zo a, zanin hian Leicester City an mikhual ang.
Social media lama video post darhah Manchester City striker Erling Haaland hian midang puihnain Vitality Stadium a chhuahsan a, a kehimit veilamah protective boot a bun nghe nghe.
A player rinrawl hliam tawh chungchangah Guardiola chuan, “Min hrilh danin doctor-te chuan chawlhkar nga atanga chawlhkar sarih thleng a chawlh a ngai dawn a, beiseinain season erawh min kharpui theih kan beisei a, Club World Cup khelh hunah chuan a inpeih hman turah ngai ang.
“A chang chuan heti ang thil hi a thleng chawk a, season tluana thil thleng pangngai a ni,” a ti.
Haaland hian Pathianni inkhelah khan penalty bakah chance lian pahnih a thelh a, mahse, Nico O’Reilly siamsak atangin City siphurh a sut a, Omar Marmoush chuan Bournemouth laka City chakna goal a thun zui ta a nih kha.
English Premier League campaign khirhkhan tak zawh mek Manchester City hi Champions League leh Carabao Cup lama an tlak fel tawh avangin FA Cup hi season kal laia trophy an beisei theih awmchhun a ni tawh a, season tluana player pawimawh inhliam buaipui tur a neih reng avangin manager Guardiola tan pawh chet a khirh ve bawk a ni.
Premier League table-ah pangana luahin, season thara Champions League khelh phak an tumna kawngah point khatin palina luahtu Chelsea an pha lo.
Erling Haaland hi chawlhkar nga inkhel thei dawn lo ta se April ni 26 FA Cup semi-final match-a Nottingham Forest an hmachhawn tur telin match ruk ngawt a awl tling pha dawn a, he beisei chhinna atang hi chuan May ni 10 Premier League game-a Southampton an tum hunah a kir hman rin a ni.
A chawlh rei theih ber tur anga chhut chhin angin chawlhkar sarih hi a chawlh tlin tak tak chuan City-in Forest hnehin May ni 17 FA Cup final hi a khel hman dawn em a chiang lo.
May ni 25-a City league game hnuhnung berah erawh Fulham khelmual lut turin a fit hman rin a ni a, June leh July thla chhunga khelh tur Club World Cup pawh khel thei tura ngaih a ni.
City hian FA Cup semi-final an khelh dawn avangin Premier League match-a Aston Villa an hmachhawn tur chu sawnhlat niin, a hun tur tihchian a la ni lo.