Chawlhni ni lovah vote thlak, Chawlhnia vote chhiar pawi lovah ngai

On Nov 21, 2023 8 0

Mizoram inthlan vote chhiar hun atan Election
Commission of India (ECI) chuan December ni 3 a ruat a, hei hi Chawlhni a ni. ECI lam hian Chawlhnia vote thlak lova Chawlhnia vote chhiar chu thil pawi lovah an ngai nia sawi a ni.
Vote chhiar hun sawn tura ECI hnena ngentu NGO Coordination Committee hruaitute’n Mizoram CEO Chief Electoral Officer) Mahdup Vyas hnen atanga thu an dawn danin, ECI hian vote thlak chu mipui nawlpui huap a ni a, chu chu Chawlhni ni lo ni dangah tih a ni a, vote chhiar chu mipui huap a ni lo a, vote chhiartute a nghawng a ni mai a, chuvang chuan Chawlhni-a vote chhiar hi pawi lovah an ngai a ni.
ECI hian inthlan hmaa Mizorama an mi kawmte’n vote chhiar hun hi Chawlhni leh Inrinni ni lo se tih an sawi lo niin an sawi bawk tih thu dawn a ni.
Inthlan hmaa Mizorama tlawhtu ECI mi leh sate khan political party hrang hrang an kawm a, political party-te hian Chawlhni-a vote thlak loh ni se tiin an thlen a, vote chhiar hun chungchang chu an thlen lo.
NGO Coordination Committee hian Chawlhni leh Inrinni ni lo ni dangah vote chhiar ni se tiin ECI hi an ngen mek a, a tul chuan lungawi lohna lantir an tum.
An hruaitute hnen atanga thu dawn danin, Mizoram CEO hi Guwahati-ah a zin mek a, Thawhlehni hian a rawn haw hman chuan hmaichhana kawm an tum. Delhi-a zina ECI hotute biak an tum bawk a, hemi atan hian CEO hian appointment a siamsak theih an beisei.
ECI hian 2013 inthlan tum khan vote chhiar ni atan Chawlhni (December ni 8) a lo ruat tawh a, Mizoram tlawmngai pawlte leh political party-te ngenna avangin a tuk December ni 9 atan a sawn a ni. 2021-a Serchhip bial by-election vote chhiar ni kha May ni 2, Chawlhni a ni.