Chawmhlawm state nia kan chapo ringawt hi a zahthlak – Vanlalhmuaka

Mahni party manifesto anga central-a sum dil ngawt loa, union budget mila kal thiam a pawimawh tih BJP Mizoram president Vanlalhmuaka chuan a sawi a. Thawhchhuah nei lo, chawmhlawm ni si a kan chapo ve ringawt chu a zahthlak tih a sawi.
Thawhtannia BJP State office-a inkhawmah Vanlalhmuaka chuan, BJP sawrkar hnu, kum 2014 atanga union budget enlet chuan, a dang chho zel a, hmalakna tihhlawhtlin tawhte kalsanin, tih tur thar, hmasawnna thar hmel kan hmuh theihna tur dah chhoh zel a ni tih a sawi.
“Mizoram MLA-te hian MLA nih kan duh tawk mai thin avangin state rethei, thawhchhuah nei lo, chawmhlawm ni si chapo kan ni ringawt mai hi a zahthlak. Central budget kan zirchian a ngai a, budget mila kan kal thiam a, inherrem thiam a pawimawh. Kan state-a kan manifesto mila central-a sum zuk dil ngawt chi a ni lo tih hi kan hriat a, central zai ngai a, an budget mila kan mamawh kan hai chhuah a ngai a ni,” a ti.
Thuziakmiten state dang, Kristian pawh ni lo chief minister-te hnathawh that thu Mizoram mipui hnenah an ziak kur duah a. Kan state CM hnathawh that erawh ziah tur an hre lo thung tih BJP Mizoram president hian sawiin, “Kristian ram hian zir tur kan ngah hle. Kan tih tur awm tak ringlomiten an tih tlat chuan kan Kristianna hian keimahni ngei pawh min hneh lo tihna a ni a, kan inenlet a ngai. Union budget 2024- 2025 ah pawh in sakna tur budget a awm a, hei hi a nihna ang taka kalpui ve tawh a, Mizoram hmel titha tura kan hmanthiam ve a tul a ni,” a ti.
Kan zir thiamna hmanga dawhkan atanga hma laa sawi ngawt loin, a field-ah kan mamawh leh harsatna enfiah a, hmasawnna tur thil a taka kalchilh a, kuthnathawktute khaichhuahna tur tak tak ngaihtuah turin Mizoram sawrkar hi kan inbuatsaih a ngai tih a sawi.