Chawngtlai in Quarter-final an lut

Thawlehni khan Mizoram Volleyball Association (MVA) buatsaih JJS Trucking Bharat Benz Inter Village Volleyball tournament 2023 khelh chhunzawm a ni a. Mipa lamah Chawngtlai in hnehna changin quarter-final an lut a. Hmeichhe lamah Dawrpui Vengthar leh Kanan ten hnehna an chang ve bawk.
Thawhlehnia mipa inkhel awmchhunah Chawngtlai chuan Armed Veng LC team an hmachhawn a, set khat hloh bawk mah se hnehna an chang a, quarter-final an inhlangkai.
Chawngtlai hian Armed Veng lakah bul an tan tha a, inkhel hmuhnawm takah deuce hmangin set khatna an la hram. Harsa taka set hmasa an lak hnuin inrintawkna sang zawk nen an inlan chhunzawm a, awlsam zawkin set hnihna an la. Set hnih an hloh zawn hnuin Aizawl chhuah lam veng lian an insiamtha a, set thumnaah an la ve leh. An khingpui phur thar tak lakah tha chungchuang taka khel chhunzawmin Chawngtlai hian awlsam takin set an la leh ta mai a. 25-23, 25-19, 22-25 leh 25-11 a hnehna changin quarter-final an inhlangkai zui ta a ni.
Thawhlehni hian hmeichhe lamah inkhel pahnih a awm a. Dawrpui Vengthar leh Kanan in hnehna an chang. Dawrpui Vengthar hi ITI LC hmachhawn tur an ni a. An khingpuite an inlan thei lo. Hmeichhe lamah inkhel hnuhnung zawkah hmeichhe volleyball a veng ropui Kanan chuan Lungmuat VC lakah 25-15, 25-15 leh 25-13 in hnehna an chang.