Checkgate-a sum lak veng dawn

Sawrkarin la tura a tih ni lo, police checkgate-a sum laksak thin hria chuan thuneitute hriattir turin sawrkarin a ti.
Home minister K Sapdanga chuan hmun hrang hranga check gate-ah sumdawng lirthei veivak atangin police leh civil mi thenkhatin pawisa an lo laksak thin nia an sawi chu tihtawp a nih theih nan ngenna a siam tawh tih sawiin, ramria check gate awm te a theih angin a tlawhchhuak tawh bawk tih a sawi.
‘Dan baka chetna reng reng a awm tawh lohna turin mitinte theihtawp min chhuahpui turin ka ngen a. Danin a phut baka hetiang pawisa khawn awm thin hi kan rama mipui mamawh phurhluhna man tito tu pakhat a ni a, thil dik lo a nih bakah mipui tana harsatna siamtu a ni. Kuthnathawktute thlai thar leh thilsiam hralhchhuah kan duh a, hemi atana thil tul hmasa chu, kawng hrang hranga insumdawn tawnna muanawm leh dik neih hi a ni,’ a ti.
Home secretary chuan hriattirna tichhuakin, Vairengte, Zokhawthar, Kanhmun, Medillichera, Champhai Khankawn, Saiphai, Phaisen, Bairabi leh New Kawnpui Police check gate-ah police-ten dan kalhin zin veivak leh lirthei atangin pawisa an la thin tih sawrkarin thu a dawng a. Hei hi sawrkar thupek leh dan anga tih a nih loh avangin dan kalh a ni a, pawmzam theih a ni lo tih a sawi.
‘Hetiang ti thinte chu an thiltih sim tura hriattir an ni a. Sawrkar thupek zawm lote lakah sawrkar thikthu a chhe hle dawn,’ hriattirna chhuah chuan a ti. Hetiang bawhchhia hria chuan phone emaw whatsapp emaw sms emaw e-mail hmangin emaw Home under secretary Zahmingthanga (7005609849) ah hriattir theih a ni a, an hming leh nihna thupsak an ni dawn tih a sawi a ni.