Chelsea an chak ve ta nge nge

Thawhtan zan khan English Premier League -ah inkhel pakhat a awm a. London club pahnihte inkhelah Chelsea chuan mualneltu Fulham an hneh a, hnehna an chan ve ta nge nge. Mimuala hnehna an chan vangin Chelsea hian table-ah hma an sawn hret a, 11-naah an inhlangkai.
Craven Cottage a lenglut Chelsea hian nipui bazar liam taah sum an seng hnem leh viau a. Thlasik bazarah sum an lo seng chiam tawh bawk nen tunhnaiah bazar nan sum an seng hnem hle. Player thar lei nan sum seng hnem viau mah se manager thar Mauricio Pochettino hnuaiah beisei angin hma an sawn lo va, season thar tir lamah an talbuai tlat thung. Chak an harsat tlat laiin thawhtan zanah erawh si hnih faiin hnehna an chang ve ta nawlh a. Fulham an hneh tum hian goal thun lama harsatna tawk Mykhailo Mudryk pawhin EPL-ah Chelsea tan a vawi khat nan goal a thun a. Hei hi Chelsea lawm tikimtu a nih ngei ang.
Craven Cottage a lenglut Chelsea hian bul an tan tha a, goal an thun har lo. Minute 18-na lekah Mykhailo Mudryk chuan Levi Colwill siamsak tha tak chu awlsam takin goal-ah a chantir a, hmahruaina goal a thun. Chelsea in January thla khan Mykhailo Mudryk hi £89m zet sengin an la lut. Arsenal zawm mai tura ngaih ni tawh Mudryk hian Shakhtar Donetsk a chhuahsan hnuin a goal thun thiam a theihnghilh ta mai emaw tih turin goal a thun lo vang vang a, sawisel a hlawh hman hle. Fulham lakah goal a thun ta nawlh hian a buaina chhum zing chhem kiangin, hma a sawn phah ngei a rinawm.
Mudryk goal thun hnu hian Blues in goal an thun belh leh thuai. An hmahruaina goal lawma an au ri a reh fel hmain goal ang an thun belh zui leh zat a, minute 19-na lekah Armando Broja chuan an goal hnihna a thun. Hma taka goal hnih an thun vangin Pochettino team te an khel tha chhunzawm a. Hun tawp thlengin goal thun belh bik lo mah se goal an chhuah lo tluan a. Si hnih faia hnehna changin, point thum an hmu ve ta neg nge.
Fulham an hneh vangin Chelsea hian khelh sarih atangin point 8 an hmu a, an chunga awm Fulham lehpelin, 11-naah an inhlangkai. An mualah an tlawm vangin Fulham in hma an sawn thei lova, khelh 7 atanga point 8 tho hmuin, goal difference-a chhe zawk an nih vangin 13-naah an tlahniam ve thung.
Craven Cottage ah point thum an hmu hi Chelsea manager Pochettino chuan hma lam pana an kal tanna tur a nih thu a sawi a. Hnehna chang zawn turin nasa taka an beih tur thu a sawi tel bawk.