Chelsea an tlang hram

Ningani zan khan UEFA Conference League khel tur zawnna hnuhnung khelh a ni a. Play-off second leg-ah tlawm mah se Chelsea chu Conference League khel turin an tling.
London club lian Chelsea hi Switzerland club Servette FC hmachhawn turin Stade de Genève-ah an leng lut a, mikhual an nihna hmunah mak tak maiin an tlawm. An mualah 2-0 a chak tawh Chelsea hian bul an tan chhe hran lova, goal an thun thuai. Christopher Nkunku chuan penalty a pet goal a, minute 14-na lekah hmahruaina goal a thun. Hma takah goal thunin, si belhkhawmah 3-0 ngawtin hmahruai hman mah se an hmahruaina an humhim zo lo teuh hle.
Servette FC hian inlehthalna lian thlentir ngei tumin tan an khawh a, an khel tha zui viau bawk. Jeremy Guillemenot chuan minute 32-naah goal thunin an si phurh a sut then. Hun rei tak chhung goal a luh belh theih loh hnuin Enzo Crivelli chuan minute 72-naah Chelsea laka hma an hruai letna goal a thun. An mualah 2-1 in hmahruai mah se si belhkhawmah si khata an la hnufual vangin Servette hian goal thun an la mamawh. Goal thun ngei tumin tan khawh chiam mah se Chelsea tlarhnung an paltlang zo tawh lova, uiawm tain an tlawm zui ta a ni.
EPL club lian, an squad thuam chaka player la lut mawlh mawlh thin Chelsea hian Servette an paltlang hram vangin Europa Conference League an khel dawn a. Blues hian champion turin rin an kai zui hle ngei ang.