Chelsea an tlawm, Reds an chak zo lo

Nilai zanah Arsenal an chak laiin team lian pahnih Chelsea leh Liverpool an chak zo lo. Chelsea hi Leeds United hneh lovin an tlawm a, Liverpool leh an mikhual Sunderland te 1-1 in an inhnehtawk ve thung.
Tlem zawk ni chunga Arsenal an draw theih vanga fak hlawh tak; an mahni pawh team tha ber ang hiala inngai hman Chelsea chu table hnuai lama awm Leeds United hmachhawn turin Elland Road ah an leng lut. Arsenal laka khelh tha chungchuang tak kha Leeds United lakah an khel chhe uchuak ve leh thung. Leeds hian an mikhual lakah tha zetin bul an tan a, Jaka Bijol chuan inkhel tan atanga minute 6-na lekah hmahruaina goal a thun nghal.
Hma takah goal an thun vangin an phur a, goal thun tumim an khinpuite an viau bawk. Huaisen taka inlan Leeds hi chawlhlawk hmain an che fuh nawn leh a, Ao Tanaka chuan minute 43-naah an goal hnihna thunin, an hmahruaina a tizau. Blues in an si phurh sut tum viau mah se chawlhlawk hmain goal an thun thei lova, 2-0 a hnufual chungin chawlhlawk an hmang.
Chawlhlawk hnu lamah Chelsea game a kang hret a, goal pawh an thun ve ta thuai. Minute 50-na lekah Pedro Neto chuan goal thunin an si phurh a sut then. Neto goal thun vanga phur tharin, chak let tum viau mah se Chelsea an phur rei lo va, goal an chhuah belh leh zawk. Leeds United tan Dominic Calvert-Lewin chuan minute 72-naah an goal thumna a thun a, an hmahruaina a tizau nawn leh. Chelsea hian hun tawp thlengin goal an thun thei tawh lova, table hnuai lama awm Leeds United lakah hreh tak chungin an tlawm zui ta a ni.
Leeds United lakah an tlawm vangin Chelsea hi pathumna atangin palinaah a tlahniam. Team lian laka chak nawlh Leeds hian regelation zone an chhuahsan ve rih thung.
Nilai zana inkhel dangah Liverpool tum a tha lo nawn leh a, Anfield-a an mikhual Sunderland lakah tlawm an pumpelh theih hram chauh a, harsa takin point khat an hmu.
Season kal mekah rin phak baka khel tha Sunderland tan hian Chemsdine Talbi chuan minute 67-naah Liverpool laka an hmahruaina goal a thun. Anfield-ah ngei goal an chhuah hmasak vangin Liverpool in goal thun ngei tumin tan an khawh zui nasa hle. Chiesa thawhrim rah sengin goal an thawkchhuak ta hram. Hun tawp dawn hnaih minute 81-naah Sunderland player Nordi Mukiele chuan an lamah a ti-goal a, he goal hmang hian Liverpool in an tualzawlah ngei tlawm an pumpelh theih hram chauh.
Anfield a khel tha tak Sunderland hian khelh 14 atanga point 23 hmuin parukna an luah a. Liverpool erawh chuan khelh 14 atanga point 22 hmuin parukna an luah ve thung a. Ningani zana Manchester United result a zirin an dinhmun danglam thei reng a la ni thung. Anfield a hlauhawm thin Liverpool khan Anfield ah team zuamawm an ni rih.