London club lian Chelsea chuan season thar atan an squad an thuamchak a, Everton in an lak hman tep Dewsbury-Hall atangin an la lut a, kum ruk daih cotract an ziahpui.
Chelsea chuan kum 25 mi Dewsbury-Hall manah hian £30m an seng a, kum 2030 thleng an hnena cham turin contract an ziahpui. Leicester City academy chhuak Dewsbury-Hall hi Everton in lak an tum hmasa zawk a, Foxes nen hian man leh mualah pawh inremna an lo nei hman hial tawh nghe nghe. Heti a ni chung hian Chelsea chuan lak tumin hma an la zui ta tho a, Dewsbury-Hall-a’n a lo zawm chak zawk bawk nen an la lut zui ta a ni.
Leicester City hian an player tha Dewsbury-Hall hralh hi an hreh ve hle a, EPL-a sum hloh phal chin an bawhchhiat lohna turin sum lak luh an mamawh ngang mai si a, ui tak chunga Dewsbury-Hall hi an hralh lo thei lo dinhmunah an ding.
Chelsea midfielder thar ni ta Dewsbury-Hall hi Leicestyer City atanga inzirchhuak a ni a, kum 2017 atang khan senior team tan a khel tan. Beisei angin senior team-ah hmun a chang thei mai lova, inchher hriam turin Blackpool leh Luton Town te chu loan in a zawm zak zak. Foxes-a a kir leh hnuin player pawimawh a ni chho ta a, 2023-24 season-ah khan championship-ah vawi 44 khelin goal 12 a thun a, Leicester City player of the season a ni ta hial nghe nghe. Season liam taah tha taka a inlan vangin ngaihven a hlawh a, EPL a club lian leh hausa ber pawl Chelsea a zawm zui ta hial a ni.
Chelsea hian Dewsbury-Hall hi nipui bazar inhawng meka player an lak palina a ni a, defender Tosin Adarabioyo (Fulham), midfielder Omari Kellyman (£19m – Aston Villa) leh Barcelona rawlthar forward Marc Guiu te an lo la lut tawh bawk.
Chelsea in Dewsbury-Hall an la lut
Get real time updates directly on you device, subscribe now.
Prev Post
Next Post