Chelsea in final an lut

Thawhlehni zan khan Fifa Club World Cup 2025 semi-final hmasa zawk khelh a ni a, Flumines lakah 2-0 a hnehna chang Chelsea in final an lut. 
MetLife Stadium-a inkhelah Chelsea in bul an tan tha viau a, Brighton atanga an lak luh João Pedro a langsar. Flumines player hlui João Pedro hian inkhel tan atanga minute 18-naah a club hlui laka Chelsea hmahruaina goal a thun. Pedro hian a club hlui zahna lantirin a goal thun hi a lawm chiam duh lo. Chak tura rinkai zawkin goal an thun hmasak vangin inkhel boruak a dul a, Brazil club in English club an ngam meuh lova, si khat faia hnufual chungin chawlhlawk an hmang.
Chawlhlawk hnu lamah Chelsea an khel tha chhunzawm a, goal an thun leh thuai. Goal hmahruai thuntu Joao Pedro chuan minute 56-naah pui zetin an goal hnihna a thun a, an hmahruaina a tizau. Si hnih faia hmahruai tawh Chelsea tan hian Christopher Nkunku chuan goal thun theihna hun tha hmu fo mah se a chhawr tangkai thei lo. Hun tawp dawn hnaih lamah Rio club lian Flumines in an si phurh sut tumin tan an khawh nasa hle a, goal thun theihna hun tha pawh an nei. Herchules a shot tha zet mai chu Marc Cucurella chuan goal line atangin a dang thei hlauh , bench atanga lut Everaldo pawhin uiawm takin a hun tha neih a hlah ve bawk. Flumines hi Chelsea lakah an vanduai a kaltluang riau a, chawlhlawk hmaa penalty an hmuh pawh VAR rawn a nih hnuin hnawl a ni ve bawk.
2-0 a Flumines hnehtu Chelsea hian Pathianni zan final-ah Paris St-Germain leh Real Madrid te inkhela chak zawk zawk an hmachhawn zui leh ang. Final an luh vangin Blues hian £60m an dawng tling ngei dawn tih a chiang tawh a. Fifa Club World Cup a an chet that vangin Brighton atanga João Pedro an leina  £55m aia tam an dawng tling der tawh.

Get real time updates directly on you device, subscribe now.

Leave A Reply

This website uses cookies to improve your experience. We'll assume you're ok with this, but you can opt-out if you wish. Accept Read More