Chelsea in final an lut

Thawhleh zan khan English Carabao Cup semi-final second leg khelh a ni a, Chelsea chuan Stamford Bridge-a an mikhual Middles-brough chu 6-1 ngawtin an sawp a, final an lut.
Middlesbrough mualah chak zo lo ringawt Chelsea hian an mualah hnehna chan ngei tumin thapui an thawh a, an khel tha ta viau nghe nghe. An mualah hian own-goal hmangin bul an tan a, a khat mawi tawka goal thuin a tawp an khar zui a ni ta deuh ber. Inlehthalna lian thlentir tuma Stamford Bridge a lenglut Boro hian team lian lakah bul an tan tha lova, minute 15-na lekah Jonathan Howson chuan an lamah ti-goal in Chelsea hmahruaina goal a thunsak.
Hmahruai zawk an nih hnuin Blues an khel tha zui nghal chat a, chawlhlawk hmain goal thum an thun belh hman der. Hnual taka inlan Boro lakah hian minute 29-naah Enzo Fernán-dez chuan Chelsea goal hnihna a thun a. Minute 36-naah Axel Disasi goal kan hmuh hnuin chawl-hlawk dawn hnaih minute 42-naah Cole Palmer chuan an goal lina a thun zui leh a, si li faia hmahruai chung in chawl-hlawk an hmang.
Si li faia hmahruai tawh Chelsea hi chawlh-lawk hnu lamah an khel tha chhunzawm a, goal hnih an thun belh leh. Minute 77-naah Palmer chuan an goal ngana thunin an hmahruaina a tizau. Final an lut dawn tih a chian tawk tawh viau laiin minute 81-naah Noni Madueke chuan an goal rukna a thun zui leh a, an chakna sawh nghet leh zual.
Chelsea lakah si ruk fai ngawta hma an hnufual hnuin Boro in goal thun tumin tan an khawh a, an mualpho lutuk tur khuh mawi nan Morgan Rogers chuan goal a thun a, an si phurh a sut then. Hemi hnu hian goal dang a luh belh thei tawh lova, Chelsea chuan si belhkhawmah 7-2 a hnehna changin Carabao Cup final an lut zui ta ni.
Middlesbrough sawptu Chelsea hian final-ah Liverpool leh Fulham te inkhela chak zawk zawk an hma-chhawn zui ang.