London club lian Chelsea chuan an manager thar atan Mauricio Pochettino an ruat fel a, Tottenham leh Paris St-Germain manager hlui hi kum hnih daih contract an ziahpui.
Chelsea hian season liam ta khan beisei an phak lo viau a, Premier League-ah 12-na daih niin kum 25 zet hnuah EPL-a an chet chhiat ber tum a ni hial. EPL-ah 12 daih an nih rual hian FA Cup leh League Cup third round-ah Manchester City hneh lovin an tla ve ve a. Champions League quarter-final-ah Real Madrid ngam lovin an tla bawk. Season an hma chhiat em vangin manager pahnih an ban hman a, Thomas Tuchel leh Graham Potter an ban hnuin manager lai lawk atan Frank Lampard an ruai bawk. Season laklawhah manager nghet an la lut rih lova, season tawp rualin an manager thar atan Pochettino an ruai fel thung.
Chelsea manager thar Mauricio Pochettino hian July ni 1 atangin a hna a zawm tan dawn a, Stamford Bridge-ah hian kum hnih cham turin contract a ziak phawt a. A contract hi kum khat dang pawh sei theih turin inremna ziahtel a ni bawk. Blues hian an manager thar atan mi hrang hrang dawr kual bawk mah se EPL-a tawnhriat nghah Pochettino hi an mi duh ber a ni sa a. Thlasik bazarah player lei nana sum seng hnem fal Blues hian Tottenham leh PSG lo enkawl tawhtu Pochettino hnuaiah siamtharna changin, season tharah trophy lian lak ngei an tum ang.
Chelsea manager thar Pochettino
Get real time updates directly on you device, subscribe now.
Prev Post