Chetsualnaah pahnih thi

Chetsualnaah pahnih thi
Keitum khaw mi pahnih hmun hniha chetsualnaah an thi.
October 31 khan Keitum leh Serchhip inkara Ralkiaua khamah Bolero Neo MZ-01 AC 4422 a chesual a. A hmunah hian lirthei khalhtu leh chuang awmchhun Vanlalnghaktluanga (22) s/o PC Lalrinchhana, Keitum Field Veng a thi.
Thudawn danin Lalnghaktluanga hi Zirtawpni zing dar 9.30 vel khan Keitum atanga chhuakin Serchhipah Telecom lam mi hnathawk hruai tura kal a ni a, a thang rei tak avang leh phone a chhan loh avangin an zawng a, a chetsualna hmun Serchhip leh Keitum inkar Ralkiauva kham kawng thlangah chawhma dar 11.00 pelh deuhah hmuh a ni. Lirthei hi a lum thui viau tih sawi a ni.
October 31 zing dar 9.00 vel khan Keitum khaw daiah ruang chhar a ni a. Amah hi Kapngenga (74), Keitum Field Veng ami a ni.
Thudawn danin Kapngenga hi Ningani zing khan Keitum atanga km.5 vela hla, Tuichang thlen hma km.1 vela awm an huanah feh turin a chhuak a, zan thlenga a haw tak loh avangin a chhungten zing khawvar tirh atangin an zawng tan a. Zing dar 9 velah kawngkama an thlam hnuai Fuan luiah a ruang an hmu a ni.
An thlam sak hnuaiah hian Fuan lui a luang a, thlam hi a rawih tawh deuh bakah kumin tuilianin a hrut chhia a, a awn deuh tawh tih sawi a ni. Thlam luhna hi a chim a, hei hi ama rah chim a ni anga, thlam hnuai a tuiah hian a zuk tla lut ta nia ngaih a ni. Lui hi malte chen vela thuk nia sawi a ni.