Chhanlet loh hmangaihna chu umzui reng suh!

Valentine’s Day a ni dawn a, hetiang karah hian min duh ve lotu umzui reng loh kan zirthiam a pawimawh ta.
1. Beiseina i neih te chu vawng nung reng turin i infuih a, engtikah emaw chuan a la hmangaih let ve ngei che i ring tlat a. Chutiang khawp chuan atan i inpe a ni. Mahse, khatia i nghah reng lai khan, ‘ani chauh lo chu,’ ti a, a lam chauh i hawi luih ngar ngar lai khan, i kawppui awm mi tak i tawn fuh theihna remchang te khan an liamsan zel thei che a ni. I nghak reng a, a tawpah i nghak chhuak zo ta si lo a, chutih hunah chuan i tana hun tha i lo bawhpelh hman tawh si ang a, lâi takin i hawihai reng zawk thei tlat a ni.
2. Tute mah hi min hmangaih let turin kan nawr lui thei lo. Sawi belh tur pawh a awm vak lo. Rilru zau tak put a, thil chu a nih tur ang nih tir mai a tha. Eng emaw ti taka mi rilru hneh theihna riau kan nei te a nih lem loh chuan chhanlet loh hmangaihna umzui reng hi hun khawhral thlawnna mai a ni.
3. I duh ngawih ngawih si a, i rilruah a awm reng a, ani chu i ngaihtuah leh ngut ngut thin a, a chetvelna te i thlithlai tu reng a, social media lamah pawh a sulhnu i chhui ru reng bawk a. Thildang pawh i ti hman meuh lo a, hna te pawh i thulh phah lek lek fo ang. Tichuan, ani tana i hun khawhral kha han chhut teh le, nikhatah darkar engzat nge amah ngaihtuah leh a sulhnu chhui a, thildang tihman lo a i rilru i sen le. Chhanlet loh hmangaihna avanga i hun khawhral zozai kha chhutchhuak chhin teh, uiawm tham tak a ni ang.
4. Hetianga min duh ve lotu, kan duh tlat si te chanchin lah hi kan sawi peih em em a, thiante bulah kan sawi reng a, chu chu anni tan ninawm chin a awm dawn a nia.
5. Engtinge ani ber kher? Engatinge ani chu i duh tlat tih kha an inzawt nawn fo teh. A englai kha nge i duhna chhan? I suangtuahna ramah inpahniha inkawp angin han insuangtuah la, in inmil dawnin i hria em? Uluk takin han ngaihtuah teh, kan milpui loh tur deuh te hi kan lo um reng thei a nia. Hun khawhral thlawnna mai a ni.
6. I duh em em nen chuan eng nge in inmilna tur ni a i hriat thil chi hrang hrang te ziak chhuak chhin la, ziah tur i hre mang lo a nih chuan i hun hlu tak kha ani umzui nan khawhral tawh suh!