Chhas bem nawm chhan

Duh deuh kan nei a, an rilru hneh ngei tuma theih tawp kan chhuah lai hi a tawpa kan hneh tak hnu aiin a nuam zawk mah awm asin. Chutiang chu mithian ten zirchianna an neih atanga an hmuhchhuah pawh a ni tlat mai.
Dr Labroo leh a thawhpui Sarah Kim, University of Chicago a mi te chuan zirchianna neiin, mipa thenkhat chuan hmeichhiate ngaihzawn tuma theih tawp chhuaha an chhai lai vel boruak chu an inngaihzawn tak tak tak hnu aiin nuam an ti zawk tlat a awm e.
Zirchianna neitu te chuan mipa chi hrang hrang te chu hmeichhe thlalak fiah tha tak leh, fiah lutuk lo te an entir a, mipa tam zawk chuan thlalak fiah lo zawka hmeichhe thla chuan a hip zawk niin an sawi tlat mai. A chhan pawh thlalak fiahlo chu engtin emaw a belhchian ngai, leh chhai thluk mai harsa zawk tura a ngaih vang a ni tlangpui. Thlalak fiah leh fiah loa hmeichhia thla lang chu hmeichhe thuhmun an ni tho si.
Mahse, mipa zawng zawng an inang vek lo tih hriat a erawh a tha. Mipa zakzum deuh zawk leh zei vak lo chite chuan thlalak fiah chu an duh zawk a, chutihlaiin, mipa zei, hmeichhe han chhai dan vel a harsatna lutuk nei lo ho chuan thlalak fiah lo chu an duh zawk thung.
Awlsam thil neih mai ai chuan harsa deuh taka hlawhchhuah ngaihlu zawk te kan awm a. Inngaihzawnnaah pawh mipa thenkhat chuan a inngaihzawnna boruak tak tak ai chuan inngaihzawn hmaa inrim lai vel boruak kha nuam tizawk an awm ve tlat a ni.
Mipa thenkhat chuan ngaihzawn tumin theih tawp an chhuah a, an han inngaizawng ta tehreng a, hlawhtling taah inngaiin an kalsan leh hlauh thin. Chutiang mizia chu hmeichhe tan a huatthlala hle thung.
He zirchianna chungchang hi Journal of Consumer Research-ah tarlan a ni.