Chhatisgarh-ah Maoist general secretary that

Chhatisgarh-ah Maoist general secretary that
Indian venhim hna thawktute chuan Maoist hel pawl hotu leh a thuihhruai mi eng emaw zat an that tih an ram home minister chuan a sawi a, kum tam tak chhung an inbeih tawhah lehlam tana chhiatna lian ber pakhat a tlin thu a sawi.
India hi kum 1967 atang tawha a beih Naxalite hel, Maoist rilruin a hruai movement-a la tel tlem chu hmeh mih vek tumin a bei mek zel.
Union Home Minister Amit Shah chuan Nilaini khan an ram laili, Chhattisgarh-ah hel 27 an thah zingah Nambala Keshav Rao, Basavaraju tia an koh thin bawk a tel tih a sawi a ni.
Shah-a hian Rao-a hi an awm phal loh, Communist Party of India-Maoist pawla general-secretary a nih thu leh Naxal movement-a ‘an hruaitu lawk ber leh an rinrawl ber’ a nih thu a sawi bawk.
“Tun hi kum 30 chhunga India-in Naxalism laka beihpui a thlak tawha kan sipaiten general-secretary nihna chelh hruaitu an thah hmasak ber a ni,” a ti a. “Hetiang hlen thei kan venhim hna thawktu leh agency-te ka chhuakin ka lawmpui tak zet,” a ti.
Shah-a hian mi an thah baka beihpui an thlak zuinaah mi 54 an man tih a sawi a, Naxalite nia hriat mi 84 chu Chhattisgarh, Telangana leh Maharashtra-ah an inpe zui tih a sawi.
Police hotu lian, Vivekanand Sinha-a chuan thuruk an dawnah ‘Maoist hruaitu lawkte’ an awm tih an hriat atanga beihpui an thlak tih a sawi a. Police commando pakhat a thi ve niin police hotu dang, P Sundarraj-a’n a sawi bawk.
Chhattisgarh Chief Minister Vishnu Deo Sai chuan beihpui thlaknaa thawk chhuakte hi District Reserve Guard special police force an ni deuh ber tih a sawi a. An huaisenna a fak a, Maoist-te chu inpe tura sawmin tuna an khawsak ang chu chhunzawm tawh lo turin a ngen niin The Times of India chanchinbuin a tar lang.
Prime Minister Narendra Modi-a pawhin sipaite a chhuangin an hlawhtlinna chu chhinchhiahtlak a nih thu a sawi a. Sorkar chu Maoism hmeh mih tumin a kal zel dawn a, muanna leh thanna thlen a tum tih a sawi bawk.
Communist Party of India General Secretary Doraisamy Raja ve thung chuan, “CPI chuan Chhattisgarh-a rawng taka Maoist hruaitu hlun leh Adivasi tam tak thah an ni hi a dem a. Hel pawl beihna chhuanlama hmanga dan pela chetna a thleng leh ta a ni,” a ti.
“CPI chuan tuna thil thleng leh Operation Kagar kalpui dan hi a hrana chhui kan phut a. Chhattisgarh mipui bakah India ram pum hian thu dik hriat an phu a ni,” tiin X-ah a tar lang.
Maoist rebel movement hi Himalaya tlang dunga tlang bulthut khaw pakhat, Naxalbari hming chawia phuah niin kum 60 dawn liam taa intan kha a ni.
Thingtlang khaw miten an ram leh in leh lo neitute laka an chanvo an chan theih nana kum 1967-a an beih atang khan hel, sipai leh civil mi 12,000 chuang thi an awm tawh.
Kum 2000 chho vela an vanglai kha chuan India hmun thuma thena hmun khat vela zau thununin fighter pawh 15,000 atanga 20,000 vel an nei.
Sorkarin a chhinchhiah dan chuan nikum atang khan Indian sipaiten hel 400 vel an that tawh.
Kar hmasa khan sorkarin ‘Naxalism laka beihpui thlakna lian ber’ tia a sawiah Indian venhim hna thawktute chuan Chhattisgarh leh Telangana inrina bawrah Maoist hel 31 an that.
Tun hnaiah Chhattisgarh leh Jharkhand-ah Indian sipaiten hel 11 an that bawk a. February khan 11 thah niin March-ah 30 thah an ni.
Thla hmasa khan Maoist-te hian sorkarin a sipaite a hnuh kira an laka beihpui thlak a tihtawp chuan inbiak an inpeih tih an sawi a. “Mipuite duh angin kan party chu muanna atana inbiak kan inpeih,” tiin an rorel khawl lian ber chuan thu an chhuah a ni.