Chhattisgarh-ah Maoist 29 inpe

Indian sorkarin a ram chhunga Maoist hmeh mih a tumnaah hlawhtlinna chang zelin Nilaini pawh khan Chhattisgarh-a Sukma district-ah 29 an inpe leh tih thuneituten an sawi.
Inpete hi Communist Party of India (Maoist)-a wing hrang hranga inhmang tak tak niin state police leh Central Reserve Police Force hotute hmaah an ralthuam an tung a ni.
An zingah hian luman Rs. nuai 2 chhiar lai, Gogunda-a Dandakaranya Adivasi Kisan Majdoor Sangthan (DAKMS) hotu ber, Podiam Budhra pawh a tel a. Mi dangte hi DAKMS, hel leh Janatana Sarkar wing-a mite an ni hlawh tih police-in an sawi.
Sukma Superintendent of Police (SP) Kiran Chavan-a chuan sorkarin tharum thawhna kalsana nun pangngaia nungte a chhawmdawlna, ‘Poona Margem’ avanga inpe an nih ber thu a sawi.
Thuneitute chuan tun hnaia Gogunda-a venhim hna thawktute inkulhna siam chuan Naxal laka beihpui thlaknaah awmzia a nei hle niin an sawi a. Na zawka nawrin Maoist movement leh chet velna a chep phah hle niin an sawi.
Gogunda hi kilkhawr leh chhengchhia niin tun hma chuan Maoist hnuaia Darbha division tan hmun him a ni thin a. Venhim hna thawktuten an thutchilh hnuah an chakna chhu chhiain an baihvai tawh hle niin Chavan-a chuan a sawi.
Sukma SP hian Maoist dangte pawh tharum thawhna bansana inpe tur leh sorkarin an tana hamthatna a siamte chhawrtu ni ve turin a sawm.
Ningani kal ta khan Dantewada district-ah Moaist 63 an lo inpe tawh bawk a, a hma ni chiahin Sukma-ah 26 an inpe bawk.
Sorkarin a chhinchhiah dan chuan nikum khan Chhattisgarh-ah hian Maoist 1,500 chuang an inpe a. Sorkar laipui chuan March 31-ah hian Naxalism hi nuai chimih vek a tum mek a ni.