Chhattisgarh-ah Moaist ten mi 14 that

Chhattisgarh leh Odisha nena an inrina bul lawk, Gariaband district-a Chhattisgarh police nen an inbeihnaah Maoist 14 thah leh an ni tih Thawhlehni khan news agency ANI leh PTI chuan an tar lang.
Police thu sawi an tar lan chhawnah hian inbeihna hi Thawhtanni zan leh Thawhlehni tuka beihpui an thlaknaa thleng niin thi zingah hmeichhe pahnih an tel tih an tar lang.
An that zingah hian sorkarin a luman pawh Rs. vaibelchhe 1 an chhiar pakhat chu a tel tih police chuan an sawi a, mi dangte pawh an bei zui mek zel bawk.
Maoist an thah leh hliam tuar zat hi an inchin fel hnuah chuan an pun pawh a rinawm niin an sawi bawk.
Mainpur Police Station huam chhunga thil thlengah hian CoBRA sipai pakhatin hliam a tuar bawk niin thuneitute chuan news agency PTI hnenah an sawi.
Beihpui thlaknaah hian District Reserve Guard (DRG), Central Reserve Police Force (CRPF), Chhattisgarh Police-a CoBRA leh Odisha Police-a Special Operation Group (SOG) an thawk chhuak tih an sawi.
Chhattisgarh-a Kularighat reserve forest, Odisha-a Nuapada district atanga km 5 leka hlaah Moaist an awm tih thu an dawn bawhzuiin Pathianni zan khan an thawk chhuak a, inkahna hi a thleng zui ta a ni.
An mi thahte kut atang hian silai, a mu leh IED-te pawh an hmu tel a. Heng zingah hian self-loading rifle pawh a tel tih thuneitute chuan an sawi.