Chhattisgarh-ah Rs. nuai 64 luman nei telin Maoist 61 inpe

Chhattisgarh-a Dantewada district-ah Nilaini khan thuneitute hnenah Maoist 71 an inpe a, an zinga 30 hi an luman belhkhawm pawh Rs. nuai 64 lai a tling niin police hotuin a sawi.
Maoist inpete zingah hian hmeichhia pawh 21 an tel a, police hotu leh CRPF hnenah inpein Maoist thuthlungah ‘kawrawng’ a awm avangin an chhuahsan tih ans awi niin Dantewada Superintendent of Police Gaurav Rai-a chuan a sawi.
Inpe zingah hian rawlthar kum 17 mi leh tleirawl kum 16 leh 17 mi pawh an tel a ni.
Maoist-te hian Bastar Range police-in inpete chhawmdawlna an siam, ‘Lon Varratu’ leh ‘Poona Margem’ chuan inpek a tichâk zual a, state sorkarin inpete chhawldawmna tura ruahmanna a neihte chuan a hip bawk tih Rai-a chuan as awi bawk.
An zinga mi, Baman Madkam (30) leh Samila Mandavi (20), Manki tia an koh bawkte chu an luman Rs nuai 8 chhiar ve ve an ni a. Shamila tia an koh, Somli Kawasi (25), Gangi tia koh, Rohni Barse (25), Deve tia koh, Kavita Madvi (25) leh Santosh Mandavi (30) te luman pawh Rs nuai 5 theuh a ni bawk.
Mi dang pakhatin Rs nuai 3 luman neiin parukin Rs nuai 2 theuh, pakuain Rs nuai 1 theuh leh pariatin Rs 50,000 theuh luman an nei bawk.
Baman, Shamila, Gangi leh Deve te hi venhim hna thawktu beihna hrang hranga inhnamhnawih nia hriat an ni a. Mi dangte pawh hi kawngpui tichia, thing kit ru, Maoists banner, poster leh pamphlet thehdarha tar thin nia hriat an ni bawk tih SP chuan a sawi.
SP hian June, 2020-a ‘Lon Varratu’ (Gondi tawng, i in/khuaah lo haw rawh tihna) campaign an kalpui hnuah Dantewada district-ah bik chauh Maoist 1,113 inpe an awm tawh a, an zinga 297 chu luman nei lai an ni tih a sawi.
Maoist kalsana inpete hi Rs 50,000 theuh pek zel an ni a, state sorkarin hel inpete chhawmdawlna tur kalphung a duan angin thil danga chhawmdawl leh chawi kanna ruahman a ni bawk tih a sawi.
Tun hnaiah Maoist hruaitu lawk tak pahnih chu Chhattisgarh-a Narayanpur district-ah thah an ni a, hei hian an pawl chak tawk lo ni sa boruak tizuai zualin an mite pawhin chhuahsan duhna rilru an put nasat phah niin Thawhlehni khan police hotu lian pakhat chuan a lo sawi tawh.
Kum 63 mi, Raju Dada tia koh, Katta Ramachandra Reddy (63) leh kum 67 mi, Kosa Dada tia an koh, Kadari Satyanarayana Reddy te kha Central Committee member ve ve niin Rs vaibelchhe 1.80 ve ve luman nei lai an ni a. Thawhtanni khan Farasbeda bul tlangram ngaw leh leh Abujhmad-a Toymeta khaw bulah thah an ni.