Chhattisgarh CM-in CRPF motor-te endik turin ngen

Bhupesh Baghel chuan Chhattisgarh-ah chuan CRPF units leh sipai tamtak an awm thu sawiin an mamawh ber chu an state-ah sipai unit tam zawk lo awm belh a nih thu a sawi. Chhattisgarh Chief Minister Bhupesh Bhagel chuan Ningani khan BJP chu CRPF motor hmanga pawisa leh thil tul dang inthlannaa voters te hneh theitu tur hmanruate phurh kual nana hmang mai maiah a puh a. Election Commission chu sipai motor-te ngun taka check turin a ngen a ni. Baghel chuan chanchinbumite hnen ah, “Election Commission hi CRPF motor-te hi check turin ka ngen a ni. Kan state-ah hian BJP te hneha an awm hi an pawm a ni. A tawp ah erawh chuan BJP ten vote zawn nan thingrem pawisa-a khat an rawn keng a ni. Hei hi thil pawi tak a ni. He thil ah hian Congress chuan complain a siam dawn a ni. State chhungah CRPF tam tawk tak an awm tawh laia CRPF company tamtak rawn dah luh leh hi enge a tulna,” tiin a sawi a ni.
Baghel chuan BJP chu chi leh chi leh sakhaw inleh chungchang ah te a bei nasa hle a. Baster-a mipui pungkhawmte hmaah thu sawiin Baghel chuan, “BJP te hian thupui pahnih chiah an nei, chi inthliarna leh sakhaw inleh chungchang chauh a ni. Unau te a insual tir a, mipui te inngeih loh tirin chuta tang chuan vote a zawng thin a, an chhungril ah inhuatna leh kut thawh duhna rilru a tuh a ni,” tiin na takin BJP chu a bei a ni. Congress hian a hma-in thil pawimawh hriat tur tul te ECI ah hian an lo thehlut tawhin Assam Chief Minister Himanta Biswa Sarma-an Chhattisgarh Minister Mohammad Akbar chungchang mawi lo taka a sawina laka action la turin a lo ngen tawh a ni. Chhattisgarh-ah hian Assembly seat-90 awmin inthlanna hi chhawng hnih-a neih tur niin November ni 7 leh 17-ah te a ni a, December ni 3-ah vote hi state dang ruala chhiar tur a ni.