Chhattisgarh sorkarin Maoist inpete hamthatna pek tipung

Chhattisgarh sorkarin Maoist inpete hamthatna pek tipung
Chhattisgarh sorkar chuan Maoist inpete hnena chhawmdawlna a pek dan thar a siam dawn a, police hnena Maoist chinchang hrilhtu thah chhungte hnena zangnadawmna an pek thin pawh a leta tipungin Rs. nuai 5 atangin Rs. nuai 10 an pe tawh dawn.
Policy thar hi la tichhuah a ni lo va, tihchhuah thuai erawh a ni dawn.
Informer an tihte hi Bastar region-a Maoist laka beihpui thlaknaa police hnena an chanchin hrilhtu tihna a ni a, Maoist inpete an tel bawk.
Chhattisgarh-a hotu sang chuan, “Maoist-ten an chet chhan an puan khum vek turin suma puihna, zirna, hna siam leh chhawmdawl kalpui a ni ang,” a ti.
Policy thar hian kum 2000-a an state a pian atanga Maoist tharum thawhna avanga thite puihna pawh a huam dawn a. “Hei hian an chhungte, piansual phah leh Maoist inpete a huam ang,” a ti.
State dang mi pawh ni se Chhattisgarh-a Maoist pawi khawihna avanga thi an nih chuan hamthatna dawng tur hian an ti thei bawk.
“Police hnena thuruk hrilhtu thah chhungte hnenah Rs. nuai 10 pek an ni dawn a, a hmaa mi let thawk a ni a. Rualbanlova awm phahte hnenah pawh Rs. nuai 3 pek thin chu Rs. nuai 5 pek an ni tawh ang,” a ti.
Maoist-te tharum thawhna avanga thil chhia neite zawngnadawmna pek pawh ennawn a ni a. “In chhiate puihna tihpun a ni a, an lo leh an in sakna hmanrua chhiate pawh Rs. 60,000 atangin Rs. nuai 8 thleng pek tawh turin tih a ni dawn,” a ti.
“Inthahna leh hliam na lutuk tuar chhungte hnenah ram pek an ni ang a. Ram inpek hi a remchang lo a nih pawhin thingtlang mi hnenah Rs nuai 4 leh khawpuia mite hnenah Rs. nuai 8 pek an ni ang,” tiin sorkar hotu dang pakhatin a sawi bawk.
Sorkar hna pek theih loh chi pawh Rs. nuai 15 pek an ni ang.
Policy thar turah hian police hnena thuruk hrilhtu thah fate chu scholarship, hostel leh Right to Education (RTE) Act hmangin mi mal sikulah seat hauhsak an ni dawn a. Zirna sang zawk a nih chuan technical leh vocational course-ah kum tin Rs. 25,000 pek an ni ang a. Tharum thawhna avanga nu leh pa chân naupangte chu residential school-ah an luh man a thlawna tih a ni ang.
Maoist inpete pawh tam zawka chhawmdawl an ni dawn a. An inpek rualin Rs. 50,000 hlan nghal an ni a. “Ralthuam nena inpe chu pek belh an ni ang a, an ralthuam tun azirin zangnadawmna pek belh a ni ang,” tiin a sawi.
“Maoist zinga luman Rs. nuai 5 leh a aia tam neite chu hamthatna dang pek belh an ni ang a, in sakna tur ram leh lo tur pek an ni ang a. Khawih chet theih loh thil lei nan Rs. nuai 2 thleng an dil thei bawk ang,” a ti.
Police officer leh venhim hna thawktu dang, Maoist-te inpek theih nana thawktute pawh ‘inpeten an dawn atanga 10% an dawng ang’ tih a ni.
Policy tharah hian hmeichhiate tan pawh hamthatna a awm dawn a. “Saksham Yojana hnuaiah Rs. nuai 2 thleng loan an la thei ang a, state sorkarin a pung 3% chu a rulhsak ang,” a ti.
Maoist chetna avanga harsatna tawk hmeichhiate chu Pauni-Pasari Yojana hnuaiah khawpuia sumdawnna an tan theih dan tur ngaihtuahsak an ni ang.
Mi mal company-te pawh hamthatna siamsak tur niin Maoist inpe emaw, tharum thawhna avanga thi chhungte chhawrtu an nih chuan ‘kum nga chhung kum tin Rs. nuai 5’ pek an ni ang.