Chhawmdawl ngaite tan centre-in buhfai MT 1379 a rawn pe dawn

Khuarel chhiatna avanga in leh lo chante leh thenawm ram atanga sahimna zawnga Mizorama raltlan 45000-te tanpuina tur buhfai metric ton 1379.34, cheng vaibelchhe 5 hu chu sawrkar laipuiin Mizoram sawrkar hnenah a pe a, pekna lehkha hi August 14 khan Ministry of Home Affairs atanga dawn a ni.
ZPM Gen. Hqrs. thuchhuak chuan, chief minister Pu Lalduhoma’n Mizoramin khuarel chhiatna a tawh avanga in leh lo chante leh thenawm ram buaite atanga raltlan mi thahnem tak kan neih chuan buhfai mamawh a tisang tih kumin August 6 khan sawrkar laipui hnenah a thlen tawh a. Food Civil Supplies & Consumer Affairs minister Pu B Lalchhanzova chuan hei hi bawhzuiin, Minsitry of Home Affairs chuan Ministry of Consumer Affairs, Food and Public Distribution kaltlangin Mizoram sawrkara FCS&CA thuneitute hnenah Mizoram tan a bika buhfai mamawh pek a nih thu hi ziakin a rawn hrilh a ni.
Buhfai hi Food Corporation of India hnen atangin Supply department hian lehkha hmuh atanga ni 60 chhungin a la chhuak thei dawn tih a sawi a ni.
‘Khuarel chhiatna leh politics thil avanga mahni in lum pawh luah thei loa, rilru baihvai taka tangkhang mekte ngaihtuah a, ei tur buhfai an neih theihna tura hma latu Mizoram chief minister leh FCS&CA minister hmalakna hi ropui kan ti a. Sawrkar laipui chungah lawmthu kan sawi bakah FCI leh FCS&CA a thawk official-ten Mizoram sawkar hmalakna a hlawhtlin theihnan theihtawp an chhuah thin hi lawmawm kan ti hle a ni,’ thuchhuah chuan a ti.