Chhawr tlak skill hman theih nan Mizoram mila siam ngen

Labour, Employment, Skill Development & Entrepreneurship minister Lalnghinglova Hmar chuan Zirtawpni khan New Delhi-ah sawrkar laipuia Minister of Skill Development & Entrepreneurship Jayant Chaudhary chu a pisa-ah kawmin Mizorama skill development hmasawnna tur kawng hrang hrang a sawipui.
Ministry of Skill Development & Entrepreneurship-in Pradhan Mantri Kaushal Vikas Yojana (PMKVY) 4.0 hnuaia Mizoram puala special project an pek leh kumin March-a hemi atana sum an ruahman fel avangin Lalnghinglova Hmar hian lawmthu a hrilh a. Ministry hnuaia skill hna thawh theih hrang hrang chu Mizoram nena inmil lo a tam tih central minister hi hrilhin, Mizorama hnathawh leh skill chhawr theih mila skill hmasawnna tur duansak turin a ngen.
Mizoram mai ni lo, hmarchhak pum huapa skill chungchang inrawnkhawm neih a rawt chu, kumin October vela ruahman nise, an ti a. Mizorama zin tura a sawmna chu Jayant Chaudhury hian tihhlawhtlin a tum thu a hrilh.
LESDE minister hian India Skills inelnaa Mizo thalai tithate chungchang pawh a sawipui a. Union minister hian Mizo thalaiten theihna an neih chu tun aia sang zawk thlen tir a tum thu sawiin, hemi atan hian sawrkar laipui chu a inhawng reng tih a sawi a ni.
Ministry of Skill Development & Entrepreneurship chuan PMKVY 4.0 hnuaia Mizoram state special project atan kumin March 1 khan cheng vaibelchhe 31.06 a rawn ruahman a. He project kaltlang hian thalai 10000 chuang chu skill training pek tum a ni.