Chhiah sang lak hnua a vawi thum nan Modi leh Trump inbia

Chhiah sang lak hnua a vawi thum nan Modi leh Trump inbia
Indian Prime Minister Narendra Modi-a chuan phone-in Ningani khan US President Donald Trump-a nen an inbia tih a sawi a, New Delhi hian bungrua a thawn chhuaha a pawimawh zual bikah Washington-in chhiah 50% a laksak mek tihtlemsak an nih theih dan tur a dap.
“Kan inkara inkungkaihna awm mekte kan sawi dun a, kan chhehvel leh khawvel huapa thil thleng leh boruak inlumlette kan sawi dun a ni,” tiin Modi-a hian X-ah a tar lang.
Modi leh Trump-a hi Washington-in India atanga bungrua a lak luhah chhiah 50% a laksak hnua an inbiak vawi thumna a ni a. Chhiah sang a laksak hian Delhi-in textile, bawlhlo leh ei tur, a bikin lui lam sa thawn chhuah zatin a tuar hle a ni.
Modi-a hian Trump-a nena an inbia chu ‘tha tak leh inpawh takin’ a nih thu leh an ram ve ve chu khawvela muanna, nghehna leh thanna a awm zel theih nan thawh dun zel an tum thu a sawi.
India-in US siam lo neih kaihhnawih thil a thawn a leisak thin a tihtlem hnu leh President Trump-a’n India-Pakistan buaina ching feltua a insawina a pawmpui loh hnuah ram pahnihte inkara sumdawnna thila indawrna hi July khan tihtawp lailawk a lo ni tawh.
US-in India chet dana a ngaimawh ber leh chhiah sang pawh a laksak chhan, Indian tuialhthei thlifimtuten Russian tuialhthei an lei tlem hret hnuah inbiakna hi chhunzawm leh tawh a ni a. Tuialhthei thlifimtute hian Washington-in Russia-a Rosneft leh Lukoil a hrek hnuah an leisak tlem hret tawh a ni.
US Deputy Trade Representative Rick Switzer-a chu sumdawnnaa thawhhona sawi turin ni hnih chhung New Delhi a tlawh a, New Delhi hian Russian tuialhthei a lei avanga Washington-in na taka hremna a pek chu tihnepsak hret dan an dap ve bawk.
Russian President Vladimir Putin-a’n kar hmasa khan New Delhi hi a tlawh ve bawk a, US-in an tuialhthei lei lo tura a nawr mek karah India tan chatlak awm miah lova an pek theih reng thu a sawi ve thung.
India-in US-a bungrua a thawn hi chhiah sang lak hnuah a tlahniam nasa a. Nikum October thlaa $ tluklehdingawn 6.91 man a thawn kha kumin October-ah chuan 9% dawna tlahniamin $ tluklehdingawn 6.31 man chauh a thawn tawh a. September-a $ tluklehdingawn 5.47 man a thawn ai erawh chuan a tam thung.
Washington pawh hian India hi an bungrua an leisakah chhiah tihniam turin a duh ve tho va, American lo neituten an thar chhuah, a bikin bekang leh grain sorghum phei chu tam zawk leisak tura inhawng turin a duh a ni.