Chhiarpui 2027 tan hnai, a thawh khatnaah in chhiarpui
Indian sorkar chuan kum 2027 chhiarpui neih tur, Census 2027 thawh khatna hriattirna a tichhuak ta a, April 1 atang hian in chhiar tan a ni dawn a, September 30 thleng kalpui tur a ni ang.
In awm zat chhiar hi state leh union territory zawng zawngah neih tur niin thla ruk chhung hian state/UT pakhat zelah ni 30 hun hman tur a ni a. Hei bakah hian mahnia inhriattirna hmun tur siam a ni dawn a, hei hi a thawh khatna tan hma ni 15 chhung awh tur a ni ang.
Registrar General of India (RGI) Mrityunjay Kumar Narayan-a’n Nilainia hriattirna a tihchhuahah hei hi tar lan a ni.
Hun eng emaw chen atanga a hun sawn hlat tawh, Census vawi 16-naah hian chi bila inchhiarna pawh kalpui a ni dawn a, chhiarpui neih tur hi nikum khan sorkarin a puang a. Thawh hniha kalpui tura ruahman niin March 1, 2027-a zawh fel tura duan a ni.
Thawh khatna, in chhiarpuiah hian a chhiartute chu in tinah kalin in dinhmun, in chhunga awm leh an thil neih hrang hrang an chhinchhiah vek dawn a. In chhiar hi a hnua mi mala inchhiarna kalpui tur atana in lo chhinchhiah lawkna atana hman nghal theih tur a ni ang.
A thawh hnihna, PE (population enumeration) an tihah hian mi mal tin chu an khawsakna, khawtlang dinhmun, nunphung leh an nihna kimchang nen chhinchhiaha chhiar vek tur a ni a, hei hi February 1, 2027 atanga kalpui tan tur a ni.
RGI hian December thla khan state/UT zawng zawngte chu chhiarpui neih tura mawhphurtu inruat vek turin a lo ti tawh a, hetah hian principal census officer, district census officer, special charge census officer leh a dang dangte chu January 15-ah inruat hman tur leh portal-ah inziak lut vek turin a ti a ni.
RGI hian state tin chu mi chhiartu tur leh kaihruaitu tur pawh tifel turin a ti a, heng mite hi chhiarpui neiha a hmuna kala mi chhiar tak taktu ber an nih dawn avangin ‘a hma lama tifel turin’ a ti a. Chhiartu pakhat zel hian mi 700-800 vel chhiar zelin a viltu (supervisor) pakhat zelin a chhiartu paruk zel hna thawh vil tura tih a ni bawk.
State tin thuneitute chu mi chhiartu leh viltu an ruat zat atanga 10% zel reserve ruat tura tih an ni bawk.
December thla khan union cabinet chuan Census 2027 kalpui nan hian Rs. vaibelchhe 11,718 ruahmanna a pawm a. Sum ruahman an pawm thu a puannaah Union Minister Ashwini Vaishnaw-a chuan tun tum chhiarpui hi digital-a kalpui vawi khatna tur a nih thu leh inchhiar chhung pawh a rei loh phah dawn thu a sawi.
Khawl lama thil bik hnathawktu mi 18,600 vel an awm dawn a, anni hian tual chhung bil zelah ni 550 chuang an thawk ang a, Census 2027 kaihhnawiha technology thil bik apiang an khawih dawn a ni tih Vaishnaw chuan a sawi bawk.