Chhiatna thlen lohnan hma lak a tul Tuichhe paihna tha tak siam a ngai – Aizawl bawrhsap

Leimin tam tak chu mihringin kan siamchawp atanga intan a ni a, chhiatna thlen hnua hma lak aiin a thlen lohna tur inruahman a tul tih Aizawl district bawrhsap Er Lalhriatpuia chuan a sawi. Thenawmte ram paltlanga tuichhe paihna tur tuiluankawr siam chu danin a phal tih a sawi bawk.Aizawl district bawrhsap thar hian Nilaini khan MJA Gen. Hqrs. executive member-te a kawm a. Mizoram hmun hrang hrang, a bikin, Aizawl district-ah chhiatna a thlen tam avangin hma an la ve nasa a, tunhmaa chhiatna a thlen tuma thuneitute thutkhawm phawt a, a hmun tlawh thin chu kalphung her danglamin, thutkhawm hmain a hmun an tlawh hmasa tawh tih a sawi.
Chhiatna chu a thlen hunah chauha hma la loin, a thlen loh nana hmalak chu an duhdan a ni tih a sawi a. Mizorama leimin tam tak chu mihring siamchawp nia a lan thu sawiin, vawk vulhna tui thli leh tuihawk luankawr fel lo vanga harsatna thleng thin chu ven theih dan zawn zel tha a tih thu a sawi.
Aizawl bawrhsap chuan, tun dinhmunah silpauline bak chhiatna venna hmanrua an la neih loh avangin chhiatna, a bikin leimin zel tur ven kawngah hma an lak nasat a ngai a; tuihawk luankawr leh tuichhe paihna mumal taka siam a tul a, hei hi Building by laws pawhin a dah pawimawh tih a sawi.
“In sa tawh leh sa thar tur reng rengin tuichhe paihna an nei lo a nih chuan, an thenawmte ram kaltlanga tui luankawr siam hi danin a phal tih hriat a tul. Hei hi ram neitute pawhin hriatchian a tul. Mithiam sawi danin, leimin chhan chu lei hipna (gravitational pool) bakah tuiin a chiah hnip vang a ni ber a; tuiluankawr tha tak siam a pawimawh tih mipuiin hriat thar a tul a ni,” Er Lalhriatpuia hian a ti.
Amah chu technical lam background nei (mining engineer) a nih avangin, chhiatna thleng nasa karah bawrhsap mawhphurhna chu a kuta hlan a ni a, mipui duh leh beisei ang phak dawn lo mah se, theihtawp an chhuah tih a sawi a ni.
Zawhna chhangin bawrhsap chuan, Aizawl district-ah raltlan lut thar an awm belh loa, raltlan zinga an hotu thenkhat awmna, Durtlang Leitan ami chu a thlang a chet avangin insuanna tur dang an melh mek tih a sawi. Aizawl bawrhsap pisa kang chu sak that dan tur ruahman mek a ni tih a sawi bawk.