Chhim lam district pali-a sawrkar hnathawkte inzir

Chhim lam district pali-a
sawrkar hnathawkte inzir
Administrative Training Institute (ATI) Aizawl bultumin ni hnih awh tur, Mizoram chhim lam district pali – Lunglei, Siaha, Lawngtlai leh Hnahthial tana office inenkawl dan leh sum vawn dan zirhona chu Thawhlehni khan Lungleiah tan a ni.
ATI director Rita Lalnunmawii Pachuau chuan, training an buatsaih chu Southern Zone district pali huamchhunga sawrkar hnathawk, hmun hla zawka training kal harsat tana ruahman a ni tih a sawi a. Hna zahawmna chu a thawktuin a hna a thiamnaah a innghat tih sawiin, sawrkar hnathawkte chu engtik lai pawha inzir tur an ni a, inzir peih apiang chhawr tlak leh duhsak hlawh an ni thin tih a sawi a ni.
Lunglei district bawrhsap Navneet Mann pawhin, sawrkar hnathawkte chu sawrkar tha siamna atana hmanraw pawimawh an ni a, tha taka thawk thei turin tunlai hmasawnna mila intahhriam reng a tul tih a sawi a. Sawrkar laipuiin iGOT Karmayogi kaltlangin sawrkar hnathawkten an thiamna an tihpun leh an tahhriam zelna tur ruahmanna a kalpui tih sawiin, chumi tihhlawhtlinna peng khat atana ATI-in sawrkar hnathawkte thiam tur pawimawh zirhona a buatsaih chu lawmawm a tih thu a sawi.
Course director, ATI deputy director (Training) Lalbiakenga report danin, training hi April 2–8 chhunga kalpui mek, SADHANA (Strengthening Adaptive Development and Humane Aptitude for National Advancement) Saptah – National Learning Week puala huaihawt a ni a. National Learning Week-in a tum ber chu, sawrkar hnathawkten mahni hna theuh leh mawhphurhna thiam bel tak leh hnemhnanpui awm zawka an thawh theihnana mahni hna leh nitin khawsaknaa hman tangkai theih tur zir belh a ni tih a sawi.
Mizoram chhim lam district pali tana special training buatsaih tur hian ATI director ho hian ATI officer leh staff-te an thawkchhuak a. Sawrkar hnathawkten nitin office hna an thawhnaa an hman tur – FRSR, CCS (CCA) Rules, Conduct Rules/ Leave Rules, DPC procedure, service book, probation & confirmation, basic accounts matter, dak & file management, pay & allowances, NPS leh vacancy based roster bakah soft skill lam subject – ethics & values, problem- solving & decision- making leh mental health chungchang an zirtir dawn a ni.
Training-ah hian sawrkar hnathawk – Group A, Group B leh Group C telin, Lunglei district atangin mi 80, Siaha district 21, Lawngtlai district 30 leh Hnahthial district 25, an vaiin mi 156-in an chhim a ni.